फिल्म ‘पिताम्बर’मा अभिनेता प्रदीप खड्का पहिलो पटक पूर्ण रुपमा एक्सन भूमिकामा देखिँदैछन् । त्यसको झलक यही सोमबार सार्वजनिक टिजरमा पनि देखिएको छ । एङ्ग्री योङम्यानको रुपमा प्रस्तुत भएका उनलाई काटमारका दृश्यसहित देख्न सकिन्छ । उनलाई एक्सन अवतारमा दर्शकले पनि रुचाएका छन् । युट्युबमा टिजरलाई प्राप्त धेरैजसो प्रतिक्रिया उनकै तारिफमा देखिन्छ ।

कतिले प्रदीपलाई पछिल्लो पुस्ताको भर्सटायल अभिनेता भनेका छन् भने कतिले उनको भ्वाइस र एक्सनको तारिफ गरेका छन् । कतिपयले उनीसहित दयाहाङ राई र सौगात मल्ललाई पहिलो पटक एकसाथ देख्न पाएकोमा खुसी व्यक्त गरेका छन् । यी तीन स्टारको सहकार्यले पनि फिल्मप्रति दर्शकमा उत्साह बढाएको छ । समग्रमा टिजरलाई प्राप्त प्रतिक्रिया उत्साहजनक छ ।

युट्युबमा टिजरले भ्यूज पनि आक्रामक पाइरहेको छ । २४ घण्टामै १० लाख भ्यूज पाएको टिजरलाई हालसम्म १५ लाख बढीले हेरिसकेका छन् । यसले फिल्मप्रति दर्शकको उत्साह दर्शाउँछ । निर्देशक कृषा चौलागाईंले टिजरलाई प्राप्त भ्यूज र प्रतिक्रियाप्रति खुसी व्यक्त गरेकी छन् । टिजरले दर्शकमा बढाएको अपेक्षालाई फिल्मले पूरा गर्ने उनको दाबी छ ।

टिजर हेर्दा फिल्म बदलाको कथामा बनेको भान हुन्छ । प्रदीपको पात्रले कसैसँग बदला लिन खोजिरहेको देखिन्छ । दयाहाङ भने इन्स्पेक्टरको भूमिकामा छन् । टिजरमा थोरै ‘स्क्रिन स्पेश’ पाए पनि सौगातको इन्ट्री प्रभावशाली छ । दयाहाङ, सौगात र प्रदीपको टकरावको कथामा फिल्म केन्द्रित रहेको टिजरले छनक दिन्छ । टिजरमा फिल्मको मेकिङ उच्च देखिएको छ ।
 
ठूलो क्यानभासमा तयार भएको फिल्ममा दयाहाङ, सौगात र प्रदीपसँगै प्रमोद अग्रहरी, अनुपविक्रम शाही, सुरक्षा पन्त, दिव्यदेव, दिव्या रायमाझी, सुपुष्पा भट्ट, गौरी मल्ल, रविन्द्र झा, कामेश्वर चौरसिया लगायतको अभिनय छ । कलाकारको बलियो ‘लाइनअप’ भएकाले फिल्मले आक्रामक व्यापार गर्ने प्रक्षेपण गरिएको छ । यो फिल्म आगामी चैत २९ गतेबाट प्रदर्शनमा आउने तयारीमा छ ।