राजन भुसालको निर्देशनमा तयार भएको फिल्म ‘एक्टरः टेक वान’को ट्रेलर सार्वजनिक गरिएको छ । शुक्रबार सार्वजनिक २ मिनेट ४६ सेकेन्ड लम्बाईको ट्रेलर अभिनेता प्रदीप खड्काको वरिपरि घुमेको छ । आफ्नो परिचय बनाउन उनको पात्रले गर्ने संघर्ष र षड्यन्त्रमा फिल्मको कथा केन्द्रित रहेको देखिन्छ । फिल्ममा उनी पाइलटदेखि थिएटरको कलाकारसम्म बनेको ट्रेलरले खुलाउँछ ।
ट्रेलरअनुसार अभिनेता राजबल्लभ कोइरालाको चरित्र नकारात्मक देखिन्छ । प्रदीपको उद्देश्यमा उनी बाधक बनेका छन् । ट्रेलरमा दुई अभिनेत्री आना शर्मा र दिव्या रायमाझीसँग प्रदीपको प्रेम पनि देखाइएको छ, जुन सस्पेन्सले भरिएको छ । ट्रेलरमा सरप्राइज पक्ष भनेको अभिनेता निश्चल बस्नेतको इन्ट्री हो । तर, उनको भूमिकालाई सस्पेन्स राखिएको छ ।
फिल्ममा दिव्य देव, उषा रजक, सुशील सिटौला, सिर्जना अधिकारी, बादल भट्ट, प्रदीप के. चौधरी, सिर्जना अधिकारी लगायतको पनि अभिनय छ । आकाश बराल र निर्देशक भुसालको लेखन रहेको फिल्ममा थमन कुमार भण्डारी निर्माता र अनीश भुसाल सह-निर्मातामा छन् । यसमा नरेन्द्र मैनालीको छायांकन छ भने सम्पादन निमेष श्रेष्ठ तथा द्वन्द्व निर्देशन अष्ट महर्जनको छ ।
यही माघ १६ गतेबाट प्रदर्शनमा आउन लागेको फिल्ममा रोमन ब्रजचार्यको ब्याकग्राउन्ड म्यूजिक (बिजिएम), उत्तम न्यौपानेको साउन्ड डिजाइन, हर्कुलस बस्नेत, रोहित शाक्य र एलिस कार्कीको संगीत तथा शिशिर खाती र किरण थापाको कोरियोग्राफी छ । अदृत फिल्म्स् र अ मोती फिल्मको संयुक्त प्रस्तुति रहेको फिल्मले घरेलु बक्स अफिसमा सुखद व्यापार गर्ने प्रक्षेपण गरिएको छ ।
