भ्यालेनटाइन डेको दिन पारेर आगामी फागुन २ गतेबाट प्रदर्शन हुन लागेको फिल्म ‘रंगी’को दोस्रो गीतको रुपमा ‘तिम्रै संसारमा’ सार्वजनिक गरिएको छ । सोमबार युट्युबमार्फत् सार्वजनिक उक्त गीतमा भीम बिसी र रजज्ञा श्रेष्ठको पार्श्व गायन छ भने गायक बिसी स्वयंको शब्द रचना तथा संगीत छ । गीतलाई उदयराज पौडेलले एरेन्ज गरेका हुन् ।
शिशिर खातीको कोरियोग्राफीमा तयार भएको गीतको भिडियोमा फिल्मका मुख्य कलाकारहरु सलोन बस्नेत, नम्रता श्रेष्ठ, आयुषी ढकाल र सुमिन गुरुङ चित्रित छन् । विशेषगरी गीतले बाबु-छोरीबीचको भावनात्मक सम्बन्धलाई प्रस्तुत गरेको छ । फिल्ममा सलोन र आयुषी बाबु-छोरीको भूमिकामा छन् ।
सुरेश न्यौपानेको डेब्यु निर्देशनमा तयार भएको फिल्ममा दीलिप रायमाझी, उत्तम केसी, सुमिन गुरुङ, विशाल पहारी लगायतको पनि अभिनय छ । सलोन स्वयं प्रस्तुतकर्ता रहेको फिल्मका निर्माता सक्षम सुवेदी, करिश्मा केसी (बस्नेत) र अनिश गौतम हुन् ।
फिल्ममा सुमन गजमेरको लेखन, सौरभ लामाको छायांकन, दुर्गेश थापा, आमेश भण्डारी र भीम बिसीको संगीत, बन्दे प्रसादको सम्पादन तथा कविराज गहतराज र शिशिर खातीको नृत्य निर्देशन रहेको छ । केही दिनअघि सार्वजनिक फिल्मको ‘छ भने माया’ गीतले राम्रो चर्चा पाइरहेको छ । त्यसअघि आएको टिजरलाई पनि युट्युबमा उत्कृष्ट प्रतिक्रिया मिलेको छ ।
