दीवाकर भट्टराईको लेखन तथा निर्देशनमा तयार भएको पाँचौं फिल्म ‘मायावी’को तेस्रो गीतको रुपमा ‘सितारा जडेको’ सार्वजनिक गरिएको छ । दीक्षित पौडेल र समीरा थपलियाको स्वर, शम्भुजित बास्कोटाको संगीत तथा दयाराम पाण्डे र दीवाकर भट्टराईको शब्द छ । गीतले माइतीघरबाट अन्मिएर पराइघर जान लागेकी युवतीको विदाइको पललाई भावुकताका साथ वर्णन गरेको छ ।

विवाहको परिवेशमा तयार पारिएको गीतको भिडियोमा फिल्मका मुख्य कलाकारहरु पल शाह, दीपिका प्रसाँई, समीम खान (नव-नायक), प्रशान्त ताम्राकार, सुशील सिटौला, करिश्मा श्रेष्ठ चित्रित छन् । दीपिकाको समीमसँग विवाह भइरहँदा पल भावुक देखिएका छन् । दीपिका पनि पललाई हेर्दै भावुक बनेको देख्न सकिन्छ । यसले उनीहरुको प्रेम वियोग दर्शाउँछ ।

यसअघि सार्वजनिक भएको फिल्मका दुई गीत ‘टलटल टल्कियो’ र ‘त्यो माया हो’ अपेक्षित चल्न सकेनन् । यसैले ‘सितारा जडेको’ गीत भने चल्नैपर्ने देखिएको छ । आगामी फागुन १४ गतेबाट प्रदर्शनमा आउन लागेको फिल्ममा लक्ष्मी गिरी, राजाराम पौडेल, अन्शु महर्जन, रवि डंगोल, रमा प्रसाईं, दीपेन्द्र सिम्खडा, संगीता सिलवाल लगायतको पनि अभिनय छ ।

‘मायावी’मा ध्रुव न्यौपाने, राज कटुवाल र चन्द्र पन्तको लगानी छ । प्रवीण भट्टराई र करण सिंह कार्यकारी निर्माता रहेको फिल्ममा मञ्जु भण्डारी, राजु पराजुली र सुमित ओली भने सह-निर्माताको रुपमा छन् । फिल्मको गीतमा शम्भुजित बाँस्कोटासँगै एसडी योगीले संगीत दिएका छन् । यसमा शाहिल खानको ट्रेलर, राजु विक्रम थापाको डीओपी तथा मिलन श्रेष्ठको सम्पादन रहेको छ ।