आगामी फागुन २३ गतेबाट प्रदर्शनमा आउने तयारीमा रहेको फिल्म ‘होस्टेल ३’को ६ दिनअघि सार्वजनिक ‘टिक टिक टिक’ गीत युवापुस्तामाझ लोकप्रिय बन्दै गएको छ । रिलिजको केही घण्टादेखि नै युट्युबमा ट्रेन्डिङ यात्रा सुरु गरेको गीतलाई अन्य सोसल मिडियामा पनि निकै रुचाइएको छ । युट्युबमा १० लाख भ्यूज नजिक रहेको यो गीत यतिबेला ट्रेन्डिङ नम्बर १० मा स्ट्रिमिङ छ ।
नेपालमा मात्र नभइ विदेशमा समेत युट्युबको ट्रेन्डिङमा गीत परेको छ । कतारमा नवौँ, युएईमा पच्चीसौँ र कुवेतमा एक्काइसौँ स्थानमा रहेको गीतमा हजार टिकटक र रिल्स बनेका छन् । विशेषतः गीतको मुखडा ‘टिक टिक टिक, जाने समयसँग सिक साथी, ठिक ठिक ठिक, एक दिन हुन्छ सबै ठिक’ टिकटक र रिल्समा चर्चित बनेको छ ।
प्रवीण सिंहको कोरियोग्राफी रहेको गीतको भिडियोमा फिल्मका मुख्य कलाकारहरू पारस बम (कुल ब्वाई), रिहान गिरि, आशिष घिमिरे, पदम तामाङ, सिम्रन पन्त, हेना नगरकोटी, समा पराजुली लगायत चित्रित छन् । गीतमा अलमोडा राणा उप्रेतीको शब्द रचना, सङ्गीत तथा पार्श्व गायन छ । यसमा अलमोडासँगै सन्तोष राणाले र्याप भोकल दिएका छन् ।
गायक समेत रहेका सशान कँडेलको निर्देशन रहेको फिल्ममा माधव शर्माको पटकथा तथा संवाद लेखन छ । क्याम्पस जीवनका सङ्घर्ष, मित्रता, र रमाइलो क्षणको कथामा बनेको फिल्ममा अर्जुन तिवारी डिओपी तथा बुद्ध थापा र मनोज खत्री सिनेमाटोग्राफर रहेको छ । फिल्मको निर्मातामा सुरेश कँडेल, कर्ण कार्की र गोविन्द अधिकारी छन् भने कार्यकारी निर्माता शङ्कर कोइराला हुन् ।
