अभिनेत्री तथा निर्मात्री निशा अधिकारी ८ वर्षपछि फिल्म निर्माणमा फर्किने भएकी छन् । उनी कार्यकारी निर्माताको रुपमा आबद्ध भएको फिल्म ‘माया प्रीति’को शुक्रबार घोषणा गरिएको छ । यसअघि उनले सन् २०१७ मा प्रदर्शनमा आएको फिल्म ‘झ्यानाकुटी’ निर्माण गरेकी थिइन् । अवि श्रेष्ठको निर्देशनमा बन्न लागेको फिल्मको कार्यकारी निर्मातामा निशासहित सन्तोष कुमार कार्की छन् ।

फिल्मको घोषणा गर्दै निशाले फेसबुकमा लेखेकी छन्, ‘म कार्यकारी निर्माताको रुपमा ‘माया प्रीति’बाट पूरै नयाँ भूमिकामा सिल्भर स्क्रिनमा पुनरागमनको घोषणा गर्न पाउँदा उत्साहित छु । यो जादुयी र अविश्वसनीय यात्रा साझेदारी गर्न अधैर्य छु ।’ रोमान्टिक-कमेडी जनरामा निर्माण हुन लागेको फिल्ममा उनको अभिनयबारे भने कुनै जानकारी गराइएको छैन ।

‘माया प्रीति’ वन टू थ्री स्टुडियोज्को ब्यानरमा बन्नेछ । यो स्टुडियोजले आगामी दिनमा लगातार फिल्म निर्माण गर्ने निर्देशक श्रेष्ठले जानकारी दिए । यसअघि यो कम्पनीले लोकप्रिय टेलिभिजन कार्यक्रम ‘प्ले इट अन’ उत्पादन गरेको थियो । फिल्मको क्रिएटिभ निर्देशकमा प्रणव जोशी छन् । उनी ‘रेशम फिलिली’का निर्देशक समेत हुन् ।

निर्देशक अवि श्रेष्ठका अनुसार यो नयाँ युगको प्रेम कथा हुनेछ । फिल्मको कथाबारे उनी भन्छन्, ‘सहज परिस्थितिमा त जसले पनि प्रेम गर्न सक्छ, तर यो कथा त्यस्ता पात्रको हो, जसले असहज परिस्थितिमा पनि सहजताका साथ प्रेमलाई बचाउँछ ।’ हलिउडको प्रसिद्ध टेलिभिजन स्टेसन एचबिओ र थुप्रै अन्तर्राष्ट्रिय परियोजनामा समेत काम गरेका उनको यो पहिलो निर्देशकीय फिल्म हुनेछ ।