२०७२ सालमा प्रदर्शन भएको फिल्म ‘रेशम फिलिली’मा समावेश ‘पारी त्यो डाँडामा’ गीतले करिब २/३ वर्ष बजारमा एकछत्र कब्जा जमायो । अझै पनि जनजिब्रोमा यो गीत झुण्डिएको छ । गीतको लोकप्रियताका कारण फिल्मलाई ओपनिङ पनि सानदार मिलेको थियो । तर, रिलिजको दोस्रो दिनै (बैशाख १२ गते) ठूलो भूकम्प जाँदा फिल्म चल्नै पाएन । यद्यपि, गीतको चर्चा भने कम भएन ।
अब उक्त गीतको सिक्वेलको रुपमा ‘फेरि जालमा’ आउने भएको छ । यो गीत ‘रेशम फिलिली’कै सिक्वेल ‘फेरि रेशम फिलिली’मा समावेश हुनेछ । यसै साता सार्वजनिक हुन लागेको गीतको केही दिनअघि छायांकन गरिएको थियो । शुक्रबार गीत छायांकनका केही तस्वीर सार्वजनिक भएका छन्, जसमा फिल्मका मुख्य जोडी विनय श्रेष्ठ र सुपुष्पा भट्ट कँडेललाई देख्न सकिन्छ ।
सार्वजनिक तस्वीरमा विनय र सुपुष्पा रोमान्टिक मुडमा प्रस्तुत छन् । उनीहरुको आडैमा एउटा रुख छ, जसको हाँगामा विभिन्न रंगका छाताहरु बाँधिएको छ । गीतमा कालीप्रसाद बाँस्कोटाको संगीत छ भने कालीप्रसाद र सोमिया बराइलीको पार्श्व गायन छ । मानस राज गीतका रचनाकार हुन् । ‘जालमा’ गीत पनि कालीप्रसाद र मानसले नै तयार पारेका थिए ।
आगामी फागुन १४ गते (महाशिवरात्रि)बाट प्रदर्शनमा आउन लागेको फिल्मका लेखक तथा निर्देशक निरोज महर्जन हुन् । रौनक विक्रम कँडेल निर्माता रहेको फिल्ममा विनय र सुपुष्पासहित नीर शाह, कामेश्वर चौरासिया, प्रकाश घिमिरे, शिशिर वाङ्गदेल, महेश त्रिपाठी, मेक्सम गौडेल लगायतको अभिनय छ । फिल्मको कार्यकारी निर्माता सुरज बम ठकुरी तथा सह-निर्माता एनि थापा हुन् ।
