आगामी फागुन १४ गते (महाशिवरात्रि)बाट प्रदर्शनमा आउन लागेको फिल्म ‘फेरि रेशम फिलिली’को दोस्रो चरणको पोस्टर बुधबार सहिद दिवसको दिन पारेर सार्वजनिक गरिएको छ । जारी दुईवटा पोस्टरले फिल्मको कथावस्तुबारे महत्त्वपूर्ण जानकारी गराउँछ । धेरै नेपालीको स्वप्न मुलुक अमेरिकाप्रतिको आशक्ति र आकर्षणलाई मियो बनाएर फिल्मले कथावाचन गरेको पोस्टरले प्रष्ट पार्छ ।

एक पोस्टरमा फिल्मका प्रमुख तीन पात्र विनय श्रेष्ठ, कामेश्वर चौरसिया र सुपुष्पा भट्ट मात्र प्रस्तुत छन् । पासपोर्ट देखाउँदै भूँईमा पछारिएका विनयमाथि सुपुष्पाले आक्रोशपूर्ण भावमा बन्दुक ताकिरहेकी छन् । कामेश्वरलाई भने दुई हात जोडेर सुपुष्पासँग माफी मागिरहेको देख्न सकिन्छ । पोस्टरको नेपथ्यमा नेपालको नवनिर्मित धरहरा र अमेरिका चिनाउने ‘स्ट्याचु अफ लिबर्टी’ छ ।

अर्को पोस्टरमा पनि विनय पासपोर्टसहित देखिएका छन् । यसमा उनी खुसी भावमा चित्रित छन् । पासपोर्टको पानालाई पृष्ठभूमिमा राखेर तयार पारिएको पोस्टरमा विनय, सुपुष्पा र कामेश्वरसँगै नीर शाह, शिशिर बाङ्देल, रविन्द्र झा, मेक्सम गौडेल लगायत पनि क्यारेक्टर लुक्समा प्रस्तुत छन् । पोस्टर हेर्दा फिल्मले गम्भीर कथालाई हास्य शैलीमा भनेको बुझ्न सकिन्छ ।

यो फिल्मको पहिलो गीत ‘फेरि जालमा’ माघ १७ गते सार्वजनिक हुँदैछ । ९ वर्षअघि प्रदर्शनमा आएको फिल्म ‘रेशम फिलिली’मा समावेश ‘जालमा’ गीतको सिक्वेलको रुपमा उक्त गीत तयार पारिएको जनाइएको छ । गीतमा कालीप्रसाद बाँस्कोटाको संगीत छ भने कालीप्रसाद र सोमिया बराइलीको युगल गायन छ । मानस राज गीतका रचनाकार हुन् ।

निरज महर्जनको निर्देशन तथा रौनक विक्रम कँडेल निर्माण रहेको फिल्ममा प्रकाश घिमिरे, महेश त्रिपाठी, लक्ष्मी गिरी, एवनराज उप्रेती, सजन थापा लगायतको पनि अभिनय छ । फिल्मको कार्यकारी निर्माता सुरज बम ठकुरी तथा सह-निर्माता एनि थापा हुन् । फिल्ममा सुसन प्रजापतीको छायांकन, निर्देशक महर्जन र आकाश बरालको पटकथा तथा नरेश किङ्ग योगीको द्वन्द्व निर्देशन छ ।