९ वर्षअघिको लोकप्रिय गीत ‘जालमा’को सिक्वेल ‘फेरि जालमा’ बिहीबार सार्वजनिक गरिएको छ । फिल्म ‘फेरि रेशम फिलिली’मा समावेश उक्त गीतमा कालीप्रसाद बाँस्कोटाको संगीत छ भने उनीसहित सोमिया बराइलीको पार्श्व गायन छ । मानस राजले गीतको शब्द लेखेका हुन् । ‘जालमा’कै धुन र लयमा तयार पारिएको गीतमा ‘पारी त्यो डाँडामा हेर घाम लाग्यो’को अंश पनि समावेश छ ।
प्रदीप लामाको नृत्य निर्देशन तथा शिवराम श्रेष्ठको छायांकन रहेको गीतको भिडियोमा फिल्मका मुख्य जोडी विनय श्रेष्ठ र सुपुष्पा भट्ट चित्रित छन् । गीतमार्फत् उनीहरुको प्रेम दर्शाउन खोजिएको छ । युट्युबमा गीत सार्वजनिक भएसँगै सकारात्मक प्रतिक्रियाको ओइरो लागेको छ । धेरैले गीत रमाइलो र ‘क्याच्ची’ रहेको प्रतिक्रिया जनाएका छन् ।
‘फेरि रेशम फिलिली’ ९ वर्षअघिको फिल्म ‘रेशम फिलिली’को दोस्रो श्रृंखला हो । निर्देशक र केही कलाकार हेरफेर गर्दै निर्माण भएको फिल्मलाई निरज महर्जनले निर्देशन गरेका हुन् । अघिल्लो श्रृंखलाका निर्देशक भने प्रणव जोशी हुन् । आगामी फागुन १४ गतेबाट प्रदर्शनमा आउन लागेको फिल्मले अमेरिकाप्रति नेपालीहरुको आकर्षण र आशक्तिको कथा भन्नेछ ।
‘दिमाग खराब’का निर्माता रौनक विक्रम कँडेलको निर्माण रहेको फिल्ममा विनय र सुपुष्पाका साथै कामेश्वर चौरसिया, नीर शाह, शिशिर बाङ्देल, रविन्द्र झा, मेक्सम गौडेल, प्रकाश घिमिरे, महेश त्रिपाठी, लक्ष्मी गिरी, एवनराज उप्रेती लगायतको अभिनय छ । फिल्मको कार्यकारी निर्मातामा सुरज बम ठकुरी र सह-निर्मातामा एनि थापा छन् । यसमा सुसन प्रजापतीको छायांकन रहेको छ ।
