आगामी फागुन २३ गतेबाट प्रदर्शनमा आउने तयारीमा रहेको फिल्म ‘होस्टेल ३’को दोस्रो गीत ‘मनमा अनौठो’ सार्वजनिक गरिएको छ । शुक्रबार बिहान युट्युबमार्फत् सार्वजनिक गीतमा फिल्मका प्रमुख दुई कलाकार पारस बम (कुलब्वाई) र सिम्रन पन्त फिचर्ड छन् । गीतमा उनीहरुको प्रेम छल्किएको छ । प्रवीण सिंहको कोरियोग्राफीमा बनेको भिडियोमा मेकिङ क्वालिटी उच्च देखिन्छ ।
गीतमा शब्द रचना तथा सङ्गीत अर्जुन पोखरेलको रहेको छ भने रेश्मा पुन र उकेश रावलको स्वर छ । गीतमा प्रेम, साथ, समर्पण र आत्मीयताको भाव छ । गीत सार्वजनिक भएसँगै टिकटक र रिल्समा ट्रेन्डिङ हुन थालेको छ भने युट्युबमा सकारात्मक प्रतिक्रिया आइरहेका छन् । यसअघि फिल्मको ‘टिक टिक टिक’ गीत सार्वजनिक भएको थियो ।
सफल फिल्म ‘होस्टेल’को तेस्रो संस्करणको रुपमा निर्माण भएको ‘होस्टेल ३’लाई सशान कँडेलले निर्देशन गरेका हुन् । गायक तथा संगीतकार समेत रहेका उनको यो पहिलो निर्देशकीय फिल्म हो । यसमा उनी स्वयंको कथा छ भने पटकथा तथा संवाद माधव शर्माले लेखेका हुन् । क्याम्पस जीवनका सङ्घर्ष, मित्रता, र रमाइलो क्षणहरूको कथामा फिल्म बनेको जनाइएको छ ।
फिल्ममा पारस र सिम्रनसँगै रिहान गिरि, आशिष घिमिरे (केदार घिमिरे ‘माग्ने बुढा’का छोरा, पदम तामाङ, हेना नगरकोटी, समा पराजुली, उमर खान लगायतको अभिनय रहेको छ । अर्जुन तिवारी डिओपी तथा बुद्ध थापा र मनोज खत्री सिनेमाटोग्राफर रहेको फिल्मको निर्माताहरुमा सुरेश कँडेल, कर्ण कार्की र गोविन्द अधिकारी छन् भने कार्यकारी निर्माताको रुपमा शङ्कर कोइराला हुन् ।
