अचेल नेपाली फिल्मलाई हलमा एक हप्ता टिक्न पनि मुश्किल भइरहेको समयमा गत कात्तिक १५ गते (लक्ष्मीपूजा)बाट प्रदर्शनमा आएको फिल्म ‘पूर्णबहादुरको सारङ्गी’ले व्यापारसँगै प्रदर्शनमा अर्को महत्त्वपूर्ण कोशेढुंगा पार गरेको छ । सबैभन्दा धेरै कमाउने नेपाली फिल्मको इतिहास रच्न सफल यो फिल्मले यस वर्ष हलमा लामो समयसम्म प्रदर्शन हुने फिल्मको कीर्तिमानी बनाएको छ ।

शुक्रबार फिल्मले प्रदर्शनको सय दिने दुर्लभ यात्रा पूरा गरेको हो । काठमाडौंको सामाखुसीस्थित क्यूएफएक्स चेनको सिटी स्क्वायर हल, रञ्जना सिनेप्लेक्स, बनेपाको शुभकामना सिनेमा, बुटवल र धरानको फ्रेन्ड्स सिनेमाजसहितका १० वटा हलमा फिल्मले सय दिन मनाएको जनाइएको छ । विगत १० वर्षयता आधा दर्जन बढी हलमा नेपाली फिल्मले सय दिन मनाएको यो पहिलो पटक हो ।

फिल्मले प्रदर्शनको सय दिन मनाएको खुसीयालीमा निर्माताले सय रुपैयाँमा फिल्म देखाउने घोषणा गरेका छन् । उक्त अफर माघ २७ गतेसम्म रहने निर्माता विनोद पौडेलले जानकारी दिए । उनले केही दिनअघि फिल्म सफलताको खुसीयालीमा विशेष कार्यक्रम आयोजना गर्दै ‘पूर्णबहादुरको सारङ्गी २’ निर्माणको घोषणा गरेका थिए । योसँगै उनले फिल्म ‘रोल नम्बर १’ पनि निर्माण गर्दैछन् ।

‘पूर्णबहादुरको सारङ्गी’ले सय दिन मनाउँदै गर्दा नेपालमा करिब ४९ करोडको व्यापार गरेको छ । त्यस्तै, ओभरसिज मार्केटमा २३ करोडमाथि कमाएको जनाइएको छ । नेपाल र विदेशको कलेक्सन जोड्दा ७२ करोडमाथि हुन आउँछ । यो नेपाली फिल्मले प्राप्त गरेको अद्भूत सफलता हो । यसले अब नेपाली फिल्मलाई विश्वभरबाट सय करोडको आँकडा छुन असम्भव छैन भन्ने देखाउँछ ।

सरोज पौडेलको निर्देशनमा बनेको फिल्ममा विजय बराल, प्रकाश सपूत, मुकुन भुसाल, अञ्जना बराइली, माओत्से गुरुङ, देशभक्त खनाल, बुद्धि तामाङ, भोलाराज सापकोटा, विनोद न्यौपाने लगायतको अभिनय छ । यो फिल्मले विजयको करिअर नै कायापलट गरेको छ । यसअघि सहायक भूमिकामा सीमित भएका उनलाई यतिबेला मुख्य भूमिकामा लिन मेकरहरुबीच हानाथाप देखिन्छ ।