लभस्टोरी फिल्म बनाउन सिपालु मानिएका दीवाकर भट्टराईको लेखन तथा निर्देशनमा बनेको फिल्म ‘मायावी’को ट्रेलर सार्वजनिक गरिएको छ । बिहीबार काठमाडौंमा एक कार्यक्रमका बीच सार्वजनिक तीन मिनेट लम्बाईको ट्रेलरले फिल्मको कथावस्तुबारे जानकारी गराउँछ । प्रेम प्राप्ति मात्र होइन, त्याग पनि हो भन्ने कुरालाई फिल्मले मुख्य कथावस्तु बनाएको ट्रेलरबाट बुझ्न सकिन्छ ।

तालनगरी पोखराको परिवेशमा खिचिएको फिल्मको ट्रेलर अभिनेता पल शाह र अभिनेत्री दीपिका प्रसाईंमा केन्द्रित छ । मनमौजी स्वभावको एक युवक (पल)को जीवनमा एक युवती (दीपिका)को आगमनपछि आउने आरोह अवरोधलाई रोचक र मर्मस्पर्शी रुपमा देखाइएको छ । पलले बोलेका संवाद हाबी रहेको ट्रेलरमा उनको डाइलग डेलिभरी स्वभाविक लाग्छ ।

आगामी फागुन १४ गते अर्थात् महाशिवरात्रिबाट प्रदर्शनमा आउन लागेको फिल्ममा पल र दीपिकाका साथै लक्ष्मी गिरी, राजाराम पौडेल, अन्शु महर्जन, रवि डंगोल, रमा प्रसाईं, दीपेन्द्र सिम्खडा, संगीता सिलवाल लगायतको पनि अभिनय छ । यो फिल्मबाट समिम खानले डेब्यु गरेका छन् । ट्रेलरमा उनको विवाह दीपिकासँग भएको देख्न सकिन्छ ।

‘मायावी’मा ध्रुव न्यौपाने, राज कटुवाल र चन्द्र पन्तको लगानी छ । प्रवीण भट्टराई र करण सिंह कार्यकारी निर्माता रहेको फिल्ममा मञ्जु भण्डारी, राजु पराजुली र सुमित ओली सह-निर्मातामा छन् । फिल्मको गीतमा शम्भुजित बाँस्कोटा र एसडी योगीले संगीत दिएका छन् भने कविराज गहतराज र प्रविन सिंहको कोरियोग्राफी, राजु विक्रम थापाको डीओपी तथा मिलन श्रेष्ठको सम्पादन छ ।