‘माग्ने बुढा’को रुपमा परिचित केदार घिमिरेले पहिलो पटक मुख्य भूमिकामा अभिनय गर्न लागेको फिल्म ‘माग्ने राजा’को छायांकन सुरु नहुँदै प्रदर्शन मिति घोषणा गरिएको छ । सोमबार निर्माताले एक पोस्टरमार्फत् आगामी तीजमा फिल्म रिलिज हुने जानकारी दिए । तीज आगामी वर्षको भदौ १२ गते (बिहीबार) परेको छ । अहिलेसम्म उक्त मितिमा फिल्मलाई एकल रिलिजको अवसर छ ।
भोलि महाशिवरात्रिबाट छायांकन सुरु हुन लागेको फिल्मलाई ऋषि लामिछानेले निर्देशन गर्नेछन् । उनी आठ वर्षपछि निर्देशनमा फर्किन लागेका हुन् । यसमा केदारसहित आर्यन सिग्देल, वर्षा सिवाकोटी, विल्सन विक्रम राई, शिशिर वाङ्गदेल, शारदा गिरी, पुष्कर गुरुङ, मिस पबी लगायतको अभिनय रहनेछ । फिल्ममा केदारको जोडी वर्षासँग बाँधिनेछ ।
आरम्भ प्रडक्सनको प्रस्तुतिमा मुनाल घिमिरेले फिल्मको निर्माण गर्नेछन् । दाङ जिल्लाको घोराही उप-महानगरपालिका-४ को वडा अध्यक्ष समेत रहेका उनले यसअघि ‘खबरदार’ र ‘इच्छा’ फिल्मको निर्देशन गरेका थिए । ‘माग्ने राजा’मा नरेन्द्र मैनालीको छायांकन रहनेछ भने सामीप्यराज तिमल्सेनाको पटकथा लेखन छ । फिल्ममा केदार माग्ने राजा पात्रको भूमिकामा देखिने जनाइएको छ ।
