भोलि महाशिवरात्रिको दिन पारेर तीन फिल्म ‘लाज शरणम्’, ‘मायावी’ र ‘फेरि रेशम फिलिली’बीच बक्स अफिसमा भिडन्त हुँदैछ । मंसिरयता सुस्ताएको फिल्मको व्यापारलाई यी तीन फिल्मले चलायमान बनाउने ठूलो अपेक्षा गरिएको छ । तर, फिल्मकर्मीहरूमा भने तीन फिल्मलाई लिएर कित्ताकाटजस्तै देखिएको छ । केहीले आफू निकट व्यक्तिको फिल्मलाई मात्र समर्थन गरिरहेका छन् ।

सोमबार बेलुका निर्देशक तथा अभिनेता निश्चल बस्नेतले आफ्नो सामाजिक सञ्जाल (फेसबुक र इन्स्टाग्राम)मा तीन फिल्ममध्ये ‘लाज शरणम्’ र ‘फेरि रेशम फिलिली’को पोस्टर सेअर गर्दै हलमा बुकिङ खुलेको जानकारी गराए । र, लेखेका छन्, ‘दुवै रमाइलो होला जस्तो छ । तपाईंहरु पहिला कुन हेर्ने ?’ निश्चलले ‘मायावी’को भने पोस्टर सेअर गरेका छैनन् । यसले धेरैलाई आश्चर्यमा पारेको छ ।

एकसाथ प्रदर्शन हुन लागेका तीन फिल्ममध्ये ‘मायावी’को पोस्टर सेअर नगरेपछि यतिबेला निश्चललाई स्टाटसको कमेन्टमा गालीको वर्षा भइरहेको छ । अभिनेता पल शाहका प्रशंसकहरूले उनलाई अश्लील शब्द प्रयोग गरेर गाली गरेका छन् । कतिले ‘घमन्डी’ भनेका छन् भने कतिले उनको वर्णलाई लिएर व्यंग्य समेत गरेका छन् । तर, निश्चलले भने कसैलाई पनि जवाफ फर्काएका छैनन् ।

अक्सर निश्चलले प्रदर्शनको सम्मुखमा रहेका नेपाली फिल्मको पोस्टर सेअर गर्दै सामाजिक सञ्जालमा शुभकामना दिइरहेका हुन्छन् । तर, यसपटक उनले एउटै मितिमा आउने तीन फिल्ममध्ये ‘मायावी’लाई बेवास्ता गरेपछि फिल्मवृतमा चर्चाको विषय बनेको छ । दुई वर्ष अगाडि पल मुछिएको एक प्रकरणका कारण उनको फिल्मलाई निश्चलले समर्थन नगरेको हुनसक्ने कतिपयको बुझाइ छ ।