आगामी दशैंको फूलपाती अर्थात् असोज १३ गतेबाट प्रदर्शनमा आउने तयारीमा रहेको एक्सनप्रधान फिल्म ‘बलिदान’मा अभिनेता समीर भट्टको जोडी बनेकी अभिनेत्रीलाई चार महिनाको छायांकन अवधिभर सार्वजनिक गरिएन । छायांकनको अन्तिम चरणमा भने फिल्मकी मुख्य अभिनेत्री कविता राय रहेको खबर मिडियामा सार्वजनिक भयो । अन्ततः उक्त खबर सत्य सावित भएको छ ।
शुक्रबार निर्माण टिमले कविताको क्यारेक्टर पोस्टर सार्वजनिक गरेको छ । ‘बलिदान’मा उनले किरण पात्रको भूमिकामा अभिनय गरेकी छन् । पोस्टरमा उनी ‘एक्सन लुक्स’मा प्रस्तुत छिन् । उनको अनुहार र हातमा रगत लागेको छ । हातमा बन्दुकको ब्यारेल समातेको देखिन्छ । पोस्टरले किरण पात्रको हिंसात्मक र सङ्घर्षपूर्ण अवस्थालाई दर्शाउँछ ।
‘बलिदान’ कविताको डेब्यु फिल्म भने होइन । उनले यसअघि ‘चोर पुलिस’ जस्ता केही फिल्म र एक दर्जन बढी म्यूजिक भिडियोमा काम गरिसकेकी छन् । निर्देशक सन्तोष सेनका अनुसार फिल्ममा कवितालाई अडिसनबाट छनोट गरिएको हो । उनका अनुसार राज्यको मूलधारबाट किनारिएको भिल्ला वर्ग (काल्पनिक नाम)लाई किरण पात्रले फिल्ममा प्रतिनिधित्व गर्नेछ ।
‘किरण पात्रका लागि उपयुक्त हाउभाउ, रुपरङ र सशक्त अभिनय क्षमता भएका महिला कलाकार छनोट गर्न अडिसन आह्वान गरिएको थियो । हाम्रो कल्पनाको किरण, जसको आवरण, आचरण, लवज र पात्रले देखाउनुपर्ने प्रभावशाली अभिनय कविता रायमा भेटिएकाले हामीले उहाँलाई छनौट गरेका थियौँ,’ निर्देशक सेनले भने ।
अघिल्लो साता समीर भट्टको क्यारेक्टर पोस्टर सार्वजनिक गरिएको थियो, जसले फिल्मको ‘हाइप’ निर्माणमा ठूलो भूमिका खेलेको छ । यसमा सौगात मल्ल, अर्पण थापा, ऋचा शर्मा लगायतको पनि अभिनय छ । फिल्ममा ऋचा समीरकी आमाको भूमिकामा छिन् । ‘आसुसेन फिल्म्स्’को ब्यानरमा निर्माण भएको फिल्मको निर्मातामा पवन ब्राडफोर्ड बिस्ट र कार्यकारी निर्मातामा प्रेम पुरी छन् ।
