आगामी बैशाख १२ गतेबाट प्रदर्शनको तयारीमा रहेको फिल्म ‘भूठान’को पहिलो गीत ‘कागजको खोस्टो’ सार्वजनिक गरिएको छ । गीतमा पुष्पन प्रधानको गायन तथा संगीत र नवराज पराजुलीको शब्द रचना छ । कवि पराजुलीको युट्युब च्यानलबाट सार्वजनिक गीतले आफ्नो जन्मदेश फर्किन नपाएको आप्रवासीको व्यथा बोलेको छ । गीतमा नवराजले वाचन गरेको कविता पनि समावेश छ ।
आफ्नो देशभन्दा बाहिर रहेको पात्रले घर नफर्की मर्न पनि नमिल्ने र कालले समेत ताकेता गर्न नमिल्ने मर्मस्पर्शी भावका शब्दहरु गीतमा छन् । शब्द, संगीत र स्वरको सशक्त सन्तुलन रहेको गीतको भिडियोमा अभिनेता हरिवंश आचार्यको जीवन्त अभिनय देख्न सकिन्छ । साथै, सुसन प्रजापतिको छायांकन पात्रको भावअनुकूल छ ।
विनोद पौडेलको निर्देशनमा तयार भएको फिल्ममा हरिवंशका साथै हलिउड अभिनेता ब्रुस डर्न, दयाहाङ राई, अनुराधा मजुमदार, पूजा चन्द, ऋचा घिमिरे, जोएस पाण्डे, अदिती प्याकुरेल, टम क्रेन, विमल सुवेदी लगायतको अभिनय छ । फिल्मको निर्माताहरुमा अविरल थापा, राजेन्द्र ठकुराठी, अमिताव जोशी, सुशांक मैनाली र किर्तना बाँस्कोटा रहेका छन् ।
अंग्रेजीमा ‘द वर्ल्डस् ह्याप्पिएस्ट म्यान’ नाम राखिएको फिल्ममा अन्जय खड्काको सम्पादन, सम्बरन प्रेथु राईको संगीत र भारतका प्रख्यात कला निर्देशक अन्जन गजुरेलको कला निर्देशन छ । भुटानदेखि नेपाल र अहिले अमेरिकामा रहेका भुटानीहरुको देशप्रेम र थातथलो छोडेर विदेशी भूमिमा बस्नुपर्दा आफनो जन्मघर हराएको आप्रवासीको पीडालाई ‘भूठान’ले प्रस्तुत गर्ने जनाइएको छ ।
