नेपाली महिला राष्ट्रिय फुटबल टिमकी कप्तान एन्जिला तुम्बापो सुब्बाको जीवनकथामा आधारित फिल्म ‘अञ्जिला’को लाहुरेको सहर भनेर चिनिने धरानमा प्रिमियर गरिएको छ । शुक्रबार धरानको फ्रेन्ड्स सिनेमाजमा आयोजित प्रिमियरमा फिल्मका निर्देशक मिलन चाम्स, निर्माता प्रेमकुमार श्रेष्ठसहित विभिन्न क्षेत्रका व्यक्तिहरुको उपस्थिति रहेको थियो । प्रिमियरमा फिल्मले प्रशंसा बटुलेको छ ।
फिल्म हेरिरहँदा केही दर्शकहरू हलभित्रै रोएका थिए । प्रिमियरमा उपस्थित अधिकांशले एन्जिलाको सङ्घर्षको कथाले मन छोएको प्रतिक्रिया दिँदै मिलन चाम्सको निर्देशनको पनि सराहना गरे । फिल्म हेर्दा आफ्नो परिवार र आफूलाई नै देखेको युवा दर्शकहरुको प्रतिक्रिया थियो । फिल्मकी बालकलाकार नमिक्षा मगरले कप्तान एन्जिलाको संघर्षपूर्ण जीवन देखेर आफू भावुक भएको बताइन् ।
धरान प्रिमियरमा प्राप्त सकारात्मक प्रतिक्रियाले निर्माण टिम उत्साहित बनेको छ । निर्देशक चाम्स र निर्माता श्रेष्ठले दर्शकको माया र समर्थनले आफूहरू भावुक भएको बताए । फिल्मको मुख्य भूमिकामा समेत रहेकी कप्तान एन्जिला तुम्बापो सुब्बा व्यावसायिक फुटबल खेल्न ग्रिसमा र अन्य मुख्य कलाकारहरु फिल्मको छायांकनमा व्यस्त भएकाले प्रिमियरमा उपस्थित हुन सकेका थिएनन् ।
यही फागुन २९ गतेदेखि प्रदर्शनको तयारीमा रहेको फिल्ममा एन्जिलाका साथै दयाहाङ राई, सुनिल थापा, सिर्जना सुब्बा, माओत्से गुरुङ, विजय बराल, बुद्धि तामाङ, प्रेमकुमार श्रेष्ठ लगायतको अभिनय छ । फुटबल खेलाडी बन्न कप्तान सुब्बाले गरेको संघर्षमा आधारित रहेको फिल्मको सह-निर्मातामा विनोद अग्रवाल र राजेश बगडिया छन् । सुदीप बरालले फिल्मको छायांकन गरेका हुन् ।
