.jpg)
यही फागुन २९ गते अर्थात् होलीको दिनबाट प्रदर्शनमा आउन लागेको एक्सनप्रधान फिल्म ‘आउट लः दफा २१९’को ओएसटी गीत ‘अन्धो कानुन’ सार्वजनिक गरिएको छ । चर्चित गीत ‘अख्खा छ’का र्यापर मिस्टर डी (सन्दीप विष्ट)को र्याप, मेलोडी र शब्द रचना रहेको गीतमा नितु पुनको गायन छ । युवापुस्तामाझ चर्चित र्यापर डीले पहिलोपटक फिल्मका लागि र्याप गीत तयार पारेका हुन् ।
नेता र सरकारमाथि आक्रोश पोखिएको गीतले राजनीतिक विकृतिप्रति कटाक्ष गर्दै सरकार र कानुन अन्धो हुँदा देशमा नागरिकहरु असुरक्षित भइरहेको र नारीको अस्मिता लुटिएको भाव प्रस्तुत गरेको छ । गीतको भिडियोमा मिस्टर डी र्याप गर्दै प्रस्तुत छन् भने फिल्मका मुख्य अभिनेता सुशील श्रेष्ठ पनि चित्रित छन् । निर्देशक विक्की महर्जनले फिल्मको कथा गीतले बोलेको जानकारी दिए ।
यो गीतको भिडियोमा दीर्घ धामीको कन्सेप्ट, सम्पादन र निर्देशन छ । सलिना कार्यकारी निर्देशक रहेको गीतको भिडियोमा सलिना सुनार र साजेश बलामी पनि निर्देशन टिममा छन् । भिडियोमा नविन गुरुङको डिओपी तथा राजेश कुटुको नृत्य निर्देशन रहेको छ । गीत रिलिज भएसँगै दर्शकबाट सकारात्मक प्रतिक्रिया मिलेको छ । गीतले जनताको आवाज बोलेको प्रतिक्रिया दर्शकहरुको छ ।
निर्देशक महर्जन स्वयंको लेखन रहेको फिल्ममा सुशील श्रेष्ठ, नरेश पौड्याल, शिक्षा संग्रौला, महेश त्रिपाठी, सुमन भण्डारी, हेममान गुरुङ, विशाल पहारी, लगायतको अभिनय छ । अमित अग्रहरी र निशा गुइडेको लगानी रहेको फिल्ममा निर्देशक महर्जन र दिर्घ धामीको पटकथा छ भने विनोद कठायत कार्यकारी निर्मातामा छन् । फिल्मले कानुन नमान्ने एक पात्रको कथा भन्ने जनाइएको छ ।
