केही दिनअघि निर्देशक दीपेन्द्र के. खनालले फेसबुकमार्फत् फिल्म ‘के घर के डेरा : घर नम्बर २’ आगामी जेठ ९ गतेबाट सार्वजनिक प्रदर्शनमा आउने जानकारी गराएका थिए । तर, अब यो फिल्म एक हप्ता अगाडि सरेको छ । अर्थात् जेठ २ गतेबाट प्रदर्शनमा आउने भएको छ । यसको जानकारी फिल्मका वितरक करण श्रेष्ठले मंगलबार सामाजिक सञ्जालमार्फत् गराएका हुन् ।
यो फिल्मको रिलिज प्रि-पोन्ड हुनुको मुख्य कारण ‘महाभोज’ हो । यो फिल्म जेठ १५ गतेबाट प्रदर्शनमा आउँदैछ । यसका दुई मुख्य कलाकार आर्यन सिग्देल र खगेन्द्र लामिछानेको ‘घर नम्बर २’मा पनि अभिनय छ । एक हप्ताको अन्तरमा एउटै कलाकारको दुईवटा फिल्म रिलिज हुनु उचित नहुने निष्कर्षपछि ‘घर नम्बर २’का निर्माताले फिल्मलाई एक हप्ताअघि रिलिज गर्न लागेका हुन् ।
यो फिल्म एक हप्ता अगाडि सर्दा जेठ ९ गतेबाट प्रदर्शनमा आउन लागेको अभिनेता राजेश हमालको कमब्याक फिल्म ‘नरसिंहा अवतार’लाई ठूलो राहत मिलेको छ । सम्भवतः अब उक्त मितिमा फिल्म एकल रिलिज हुनेछ । तर, जेठमा लगातार तीन साता मल्टीस्टारर फिल्म (के घर के डेरा २, नरसिंहा र महाभोज) रिलिज हुने भएकाले व्यापारमा एक-अर्काले असर गर्न सक्ने देखिन्छ ।
‘के घर के डेरा २’मा आर्यन र खगेन्द्रसहित निश्चल बस्नेत, केकी अधिकारी, उपासना सिंह ठकुरी, प्रकाश घिमिरे, श्रृजना नापित, संजोग रसाइली, रुविना घिमिरे लगायतको अभिनय रहेको छ । ‘कर्नाली ब्लुज’, ‘एक्लो’, ‘फिरफिरे’ जस्ता उपन्यासका लेखक बुद्धि सागरको फिल्ममा लेखन छ । उनको लेखनमा बनेको यो पहिलो फिल्म हो । कृष्णबहादुर थापाको फिल्ममा छायांकन रहेको छ ।
