गायक तथा अभिनेता प्रकाश सपूतको डेब्यु निर्देशकीय फिल्म ‘वसन्त’को मल्टीप्लेक्सहरुले शो तालिका सार्वजनिक गर्दै अग्रिम टिकट बिक्री सुरु गरेका छन् । मंगलबारदेखि फिल्मको टिकट बुकिङ खुलेको हो । फिल्मले पाएको शो संख्या हेर्दा हल सञ्चालकहरूले ठूलो विश्वास गरेको देखिन्छ । बुधबार अपराह्नसम्म फिल्मले पहिलो दिनका लागि साढे २ सय बढी शो पाएको छ ।
देशकै ठूलो मल्टीप्लेक्स चेन क्यूएफएक्सले मात्र फिल्मलाई ७१ शो (काठमाडौं उपत्यकामा ३३ शो र उपत्यकाबाहिर ३८ शो) उपलब्ध गराएको छ । त्यस्तै, दोस्रो ठूलो चेन आइएनआइ सिनेमाजले तीन स्टेशनमा १६ शो र वान सिनेमाजले दुई स्टेशनमा १० शो दिएको छ । काठमाडौं उपत्यकामा मात्र फिल्मले १५० बढी शो पाएको देखिन्छ । मोफलसका हलमा पनि १ सय बढी शो छ ।
अब फिल्मलाई चुनौती भनेको प्राप्त शोलाई अकुपेन्सीमा बदल्नु हो । ‘स्टारकास्ट’, गीतसंगीत र ट्रेलरका कारण बनेको ‘हाइप’ हेर्दा अकुपेन्सी राम्रो हुनसक्ने देखिन्छ । त्यसमाथि फिल्मले एकल रिलिजको दुर्लभ अवसर पाएको छ । र, प्रदर्शनरत फिल्महरुको अकुपेन्सीमा पनि गिरावट आइरहेको छ । यो अवस्थामा फिल्मलाई दर्शक प्रतिक्रिया राम्रो प्राप्त भए व्यापार आक्रामक हुनसक्छ ।
निर्देशक सपूत स्वयंको मुख्य भूमिका रहेको फिल्ममा उनको जोडी स्वस्तिमा खड्कासँग बाँधिएको छ । यसमा प्रभात पाल ठकुरी, श्री शिभान्सी, उर्मिला लाम्गादे, खड्कबहादुर पुन, अनुप बराल, कमलमणी नेपाल, प्रकाश घिमिरे लगायतको पनि अभिनय रहेको छ । विश्वकर्मा समुदायको छोराको लेखक बन्ने सपना र आफ्नो लक्ष्य हासिल गर्न उसले गर्ने संघर्षको कथामा फिल्म आधारित छ ।
