गत फागुन २९ गतेबाट नेपालमा प्रदर्शन भएको फिल्म ‘आउट लः दफा २१९’ अब हिन्दी भाषामा रिलिज हुने भएको छ । हिन्दीमा डबिङ भइसकेको फिल्मको मंगलबार ट्रेलर सार्वजनिक गरिएको छ । साउथको ‘केजीएफ’ जस्ता फिल्मको हिन्दी डबमा स्वरांकन गरेका सचिन गोले लगायतका डबिङ आर्टिस्टहरुले फिल्ममा आवाज दिएका छन् ।

निर्माता अमित अग्रहरीले चाँडै फिल्मको हिन्दी भर्सन रिलिज गरिने जानकारी दिए । फिल्मलाई हलमा रिलिज गर्ने वा ओटीटी प्लेटफर्ममा भन्ने विषयमा कुराकानी भइरहेको उनको भनाइ छ । हिन्दी ट्रेलरलाई युटयुबमा राम्रो प्रतिक्रिया मिलेको छ । कतिले हिन्दी डबिङको प्रशंसा गरेका छन् भने कतिले नेपालको हलमा नै हिन्दी भर्सन रिलिज गर्न आग्रह गरेका छन् ।

विक्की महर्जनको लेखन तथा निर्देशन रहेको फिल्ममा सुशीलसहित शिक्षा संग्रौला, नरेश पौडेल, सुमन भण्डारी लगायतको अभिनय छ । अझै पनि हलहरुमा प्रदर्शनरत फिल्मको एक्सन कोरियोग्राफी र मेकिङ दर्शकहरुले निकै रुचाएका छन् । फिल्मको व्यापार पनि सुखद् छ । नेपालमा राम्रो प्रतिक्रिया पाएपछि विदेशी बजारमा फिल्मको माग बढेको छ ।

अमित अग्रहरि र निशा गुइडेको संयुक्त लगानीमा बनेको फिल्ममा विक्की महर्जन र विनोद कठायतको पटकथा, नविन गुरुङको डीओपी, साहिल खानको सम्पादन, चुल्ठे काजीको द्वन्द्व निर्देशन तथा रोमन बज्रचार्यको ब्याकग्राउन्ड म्यूजिक रहेको छ ।