नेपालको पहिलो ‘साइन्स फिक्सन’ फिल्म ‘एक्लो’की मुख्य अभिनेत्री बेनिशा हमालको क्यारेक्टर पोस्टर सार्वजनिक गरिएको छ । पोस्टरमा उनलाई ‘क्वीन मारा’को रुपमा चिनाइएको छ । शान्त भावमा देखिएकी उनको पहिरन र अनुहारमा रगत पोतिएको छ भने आँखाको वरिपरि सेतो रंगले मास्कको आकृति बनाइएको छ । उनको गेटअपले फिल्ममा प्रभावशाली चरित्रको संकेत गर्छ ।
बेनिशाले क्यारेक्टर पोस्टर फेसबुकमा सेअर गर्दै फिल्ममा आफू पुनर्जन्म भएको पात्रको भूमिकामा रहेको खुलासा गरेकी छन् । उनले लेखेकी छन्, ‘एक्लो’की ‘रानी मारा’लाई भेट्नुहोस् । बाँच्ने अटल इच्छाशक्तिका साथ पुनर्जन्म । उनी केवल आफ्नो लागि लडिरहेकी छैनन्, उनीसँग एउटा उद्देश्य छ, जसले सबै कुरा परिवर्तन गर्नेछ ।’
प्रदीप शाहीको निर्देशनमा तयार भएको फिल्ममा बेनिशासहित बेलायती अभिनेता जेमी बेकन, प्रदीप खड्का, विजय लामा, सुनील थापा, दीया पुन, दिनेश डिसी, कविता नेपाली, सुरज सिंह ठकुरी, त्रिचु राई, कृष्णभक्त महर्जन, विकास अधिकारी, दिग्गज खत्री, विनोद सुवेदी ‘क्षितिज’, श्रीशेष श्रेष्ठ, बाल कलाकारहरु जेमिन श्रेष्ठ, स्योन सविक सिंह लगायतको अभिनय छ ।
यतिबेला फिल्मको लण्डनमा पोस्ट प्रोडक्सनको कार्य भइरहेको छ। आगामी तिहारमा फिल्मलाई रिलिज गर्ने तयारीमा निर्माण टिम छ । फिल्मका निर्माताहरु राजु कुमार गुरुङ, हरि श्रेष्ठ, विष्णु तामाङ, उत्सव विष्ट, भाइराजा थापा, नवीन सिवा, बागवीर पुन हुन् भने कार्यकारी निर्मातामा विनोद सुवेदी ‘क्षितिज’ छन् । बाबु श्रेष्ठको छायांकन रहेको फिल्ममा राजु तामाङको द्वन्द्व निर्देशन छ ।
