आगामी जेठ ९ गतेलाई नयाँ प्रदर्शन मिति घोषणा गर्दै फिल्म ‘जन्ते बाख्रो’को पहिलो गीत ‘घामै राजा’ सार्वजनिक गरिएको छ । बिहीबार काठमाडौंमा एक कार्यक्रमका बीच सार्वजनिक गीतमा बाबुल गिरीको शब्द रचना, संगीत तथा स्वर छ भने भिडियोमा फिल्मका मुख्य अभिनेता सौगात मल्ल र अभिनेत्री गरिमा शर्मा चित्रित छन् । उनीहरुबीचको प्रेमलाई भिडियोमा उतारिएको छ ।
हरि हुमागाईंको कोरियोग्राफीमा तयार भएको भिडियोको अन्तिममा अभिनेता आसिफ शाहलाई पनि देख्न सकिन्छ । उनले कुदेर आइरहेकी गरिमालाई अंगालो हालेपछि छेवैमा रहेका सौगात निराश देखिएका छन् । यसले फिल्म त्रिकोणात्मक प्रेमकथामा आधारित रहेको संकेत गर्छ । गरिमाले मुख्य भूमिकामा काम गरेको यो पहिलो फिल्म हो ।
सिमोस सुनुवारको निर्देशनमा तयार भएको फिल्ममा रमा थपलिया, लोकेन्द्र लेखक, कमल देवकोटा, विशाल पहाडी, रुशा न्यौपाने, कुसुम शर्मा, स्नेहा जोशी, समापिका गौतम, कुशल गजमेर लगायतको पनि अभिनय छ । मुईन इन्टरटेनमेन्टको प्रस्तुतिमा बनेको फिल्मका निर्माता सन्तोष गौतम हुन् । यसमा प्रदीप भारद्वाजको कथा, पटकथा र संवाद लेखन छ ।
सामाजिक कथावस्तुमा निर्माण भएको फिल्ममा हरि हुमागाईंको डिओपी, उत्तम हुमागाईंको सिनेमाटोग्राफी, महेश काफ्ले, बाबुल गिरी, कृष्णा भारद्वाजको संगीत तथा सुनिल शिवभक्तिको सम्पादन छ । नेपाली समाजमा बेहुली भित्राउने दिन जन्तीलाई टपरीमा खुवाउने मांसहारी भोजलाई जन्ते बाख्रो भन्ने चलन छ । फिल्मको कथा यसैको वरिपरि केन्द्रित रहेको शीर्षकबाट बुझ्न सकिन्छ ।
