आगामी जेठ २ गतेबाट प्रदर्शनमा आउने तयारीमा रहेको फिल्म ‘के घर के डेरा: घर नं २’को तीनवटा पोस्टर सार्वजनिक गरिएको छ । निर्देशक दीपेन्द्र के. खनालको जन्मदिनको अवसरमा सार्वजनिक तीन पोस्टरमा प्रेम, तनाव, नैराश्यता र खुसीको मिश्रण छ ।

तीन पोस्टरमध्ये एउटामा अभिनेता निश्चल बस्नेत दौडिरहेका देखिन्छन् । उनको अनुहारको भावले तनावपूर्ण अवस्थालाई दर्शाउँछ । दोस्रो पोस्टरमा अभिनेत्री उपासना सिंह ठकुरीप्रति अभिनेता खगेन्द्र लामिछानेको प्रेमभाव देख्न सकिन्छ । काठमाडौंको गल्लीमा साइकल डोर्‍याइरहेका खगेन्द्रले अगाडि हिँडिरहेकी उपासनालाई हेर्दै मुस्कुराइरहेका छन् ।

तेस्रो पोस्टरमा भने निश्चल, खगेन्द्र र उपासनासहित आर्यन सिग्देल, केकी अधिकारी, प्रकाश घिमिरे, श्रृजना नापित लगायत चित्रित छन् । घरको ६ वटा झ्यालबाट उनीहरुको मनोदशालाई प्रस्तुत गरिएको छ । कोही खुसी त कोही निराश भावमा देखिएका छन् । यसबाट घरधनी र भाडावालको जीवन दर्शाउन खोजिएको देखिन्छ ।

एप्पल इन्टरटेन्मेन्ट, ए प्लस इन्टरटेन्मेन्ट तथा नटराज क्रियशनको प्रस्तुतिमा निर्माण भएको फिल्ममा नकिम उद्दिन, शरद श्रेष्ठ तथा किरण महर्जन निर्माता तथा युवराज कार्की कार्यकारी निर्मातामा छन् । ‘कर्नाली ब्लुज’, ‘एक्लो’, ‘फिरफिरे’, ‘उसले दिएको उमेर’ जस्ता उपन्यासका लेखक बुद्धि सागरको लेखन रहेको फिल्मका छायाँकार कृष्णबहादुर थापा हुन् ।