यस वर्षको सफल फिल्म ‘खुस्मा’का निर्देशक अशोक थापा मगरले नयाँ फिल्म ‘जलाकी’को छायांकन सुरु गरेका छन् । शुक्रबार मोसन पोस्टर सार्वजनिक गर्दै बाग्लुङको कालिका भगवती मन्दिरबाट छायांकन थालिएको हो । केही दिनअघि पोखराको विन्ध्यवासिनी मन्दिरमा फिल्मको शुभ मुहूर्त गरिएको थियो । निर्देशक थापाका अनुसार फिल्मको छायांकन तीन चरणमा गरिनेछ ।
फिल्ममा अभिनेता सोनम तोप्देन र अभिनेत्री उपासना सिंह ठकुरीको जोडी बाँधिएको छ । यो उनीहरुको पहिलो सहकार्य हो । गायक समेत रहेका सोनमले यसअघि ‘सम्हालिन्छ कहिले मन’ र ‘शाम्बाला’मा काम गरेका छन् । ‘जलाकी’ उनको तेस्रो फिल्म हो । यसबाट ‘बार्दली’ गीतको भिडियोमा अभिनय गरेकी आकृति राजभण्डारीले अभिनेत्रीको रुपमा डेब्यु गर्दैछिन् ।
त्रिकोणात्मक प्रेमकथामा आधारित भएर बन्न लागेको फिल्ममा अस्तित्व भट्टचन, माओत्से गुरुङ, बुद्धि तामाङ, संगीता थापा मगर, राजु रेग्मी मगर, खड्क बहादुर पुन (खबपु) लगायतको पनि अभिनय रहनेछ । बाग्लुङ, रुकुम, म्याग्दी, पोखरा र दक्षिण कोरियामा फिल्मको छायांकन हुने निर्देशक थापाले जानकारी दिए ।
एम मिडियाको व्यानरमा निर्माण हुन लागेको फिल्मको निर्माताहरुमा ओम घर्ती मगर, वीरबहादुर लामा, चन्द्र बहादुर भट्टचन, बेताने मगर (बबिता राना), मानबहादुर धनाह मगर र सुस्मिता बुढाथोकी छन् । शैलेन्द्र डि. कार्कीले छायांकनको जिम्मेवारी सम्हालेको फिल्ममा एसडी योगी र सरित राईको संगीत तथा सुरेन्द्र राना र राम अविरल विष्टको रचना छ ।
‘जलाकी’को शाब्दिक अर्थ झलक हो । आफू वितेर गए पनि पछिल्लो पुस्ताले जालकीलाई देखेर आफूलाई सम्झिऊन् भन्ने अभिलाषाले लेकाली भूभागका उच्च ठाउँमा यो निर्माण गरिन्छ । यसलाई मगर समुदायको आस्थाको प्रतिकको रुपमा लिने गरिएको छ । निर्देशक थापाले फिल्ममा मगर र गुरुङ समुदायको संस्कृतिलाई झल्काइने बताए । यसमा उनी स्वंयको लेखन छ ।
