गोपिकृष्ण मुभिजको व्यानरमा निर्माण भएको सिनेमास्कोप चलचित्र फ्ल्यास ब्याक( फर्केर हेर्दा) बुधबारदेखि दमौलीमा प्रदर्शन भएको छ । गत महिना देशभरका विभिन्न हलहरुमा राम्रो व्यापार गर्न सफल भएको सो चलचित्र दमौलीको उत्तरशीला चलचित्र मन्दिरमा प्रदर्शन भएको हो ।
दयाराम दाहालको निर्देशन र उज्ज्वल पौडेल, निकीता पौडेल, निरज पौडेल र निरक पौडेलको निर्माण रहेकॊ सो चलचित्रमा युवा प्रेमकथालाई समेटिएको छ । बाबुले त्यागेको र आमाले संसार छाडेको सन्तोष (निखील उप्रेती) को कारुणिक जीवनीबाट चलचित्रको कथा सुरु भए पनि बेलायतमा बस्ने परिवारको एक्लो छोरा शिरीष (आर्यन सिग्देल) र नेपालको सामान्य कृषक परिवारकी छोरी सीमा (युना उप्रेती) बीचको प्रेम कथा र यसको उतारचढाव नै चलचित्रको मूल विषयवस्तु हो ।
रेजिना उप्रेती, जेनिसा केसी, नीर शाह, रवि गिरी, रमेश बुढाथोकी, शुष्मा कार्कीलगायतका कलाकारहरुको पनि अभिनय रहेको सो चलचित्रमा सुरेश अधिकारीको संगीत रहेको छ ।
