गोपीकृष्ण मुभिजको व्यानरमा निर्माण गरिएको नेपाली कथानक चलचित्र 'कुसुमे रूमाल' लाई अष्ट्रेलियाका बिभिन्न शहरहरूमा प्रदर्शन गर्ने कार्य जारी राखिएको छ ।
गत अगस्ट महिनाको १२ तारिख देखि २५ तारिखसम्म मेलबर्नमा यो चलचित्रको सफल प्रदर्शन भईसकेको छ । अब यो चलचित्र अष्ट्रेलियाको प्रमुख शहर सिड्नीमा करिब दुई हप्तासम्म निरन्तर प्रदर्शन हुँदैछ । आगामी सेप्टेम्बर २ तारिख देखि सेप्टेम्बर १५ तारिखसम्म अष्ट्रेलियाको सिड्नी स्थित गर्ज स्ट्रिटमा रहेको सिनेमा हलमा सो चलचित्र प्रदर्शन हुँदैछ । निरक पौडेलद्वारा निर्देशित सो चलचित्रमा निरज बराल, रूबी भट्टराई, उषा रजक, रेजिना उप्रेती, तृप्ती नाडकर, निर शाहलगायतका कलाकारहरूको मुख्य भुमिका रहेको छ ।
मेलबर्नमा यो चलचित्र प्रदर्शन गरेर दर्शकहरूबाट राम्रो प्रतिक्रिया पाएपछि सिड्नीमा पनि प्रदर्शन गर्न लागिएको सोलान्चरका मनोरञ्जन कार्यक्रम प्रमुख राजु शाक्यले बताए । चलचित्र प्रदर्शनबाट उठेको रकमको १० % अष्ट्रेलियामै रहेको शब्दमाला बिधालयको निम्ती खर्चिने बताईएको छ । कार्यक्रमको फिल्मीखबर डटकम मिडिया पार्टनर रहेको छ ।
यसैगरी अष्ट्रेलियाकै ओकाल्याण्ड पार्क स्थित सिनेमा भवनमा बिकाश आचार्यद्वारा निर्देशित चलचित्र 'नाइ नभन्नु ल' प्रदर्शन हुँदैछ । सो चलचित्र पनि सेप्टेम्बर २ तारिख देखि प्रदर्शन हुँदैछ । चलचित्र 'नाइ नभन्नु ल' ले अष्ट्रेलियामा आफ्नो सफलता पाईसकेको छ । अहिले यो चलचित्र नेपालका बिभिन्न स्थानहरूमा पनि प्रदर्शन भईरहेको छ ।
