फिल्म निर्देशनमा मेसिनको उपाधी पाएका निर्देशक शोभित बस्नेत एक साथ दुई चलचित्र निर्देशनमा जुट्ने भएका छन् ।
यस अघि १८ वटा चलचित्र निर्देशन गरिसकेका निर्देशक बस्नेतले "युवराज" र "बरदान" चलचित्र एक साथ निर्देशन गर्न लागेको बताए । फिल्मीखबरसंग कुरा गर्दै बस्नेतले अबको केही दिन भित्रै युवराजको सुटिङ सुरू हुने र ४५ दिनको अन्तरालमा त्यो फिल्मको सुटिङ सकिए लगत्तै अर्को चलचित्र बरदानको सुटिङ गर्ने बताए ।
"पहिला दुईवटैको सुटिङ सक्छु अनि मात्र एक साथ दुवैको ल्याव कार्य गरेर मात्र आराम गर्छु" निर्देशक बस्नेतलले भने । २०५२ सालमा राजकुमार निर्देशन गरेर फिल्मी यात्रा सुरू गरेका बस्नेतले अब बन्ने दुवै चलचित्रमा सलोन फिल्मसको भेट र आर्ट इन्टरनेशनलको प्रस्तुती रहने जानकारी दिएका छन् । यध्पी ती दुवै चलचित्रका निर्माता र निर्देशन भने उनी नै रहने छन् ।
चलचित्र युवराज शहरको एउटा डिजे सम्बन्धी कथामा आधारित हुने छ भने बरदानमा पारिवारिक कथामा आधारित हुने बताईएको छ । यस्तै युवराजको नायकमा बिराज भट्ट पक्का भईसकेका छन् भने अन्य तीन नायिका कसलाई राख्ने भन्ने बारेमा शोभित अझै अन्यौलमा छन् ।
