नेपाली चलचित्रप्रेमी दर्शकहरूलाई दुईवटा खुसीको कुरा रहेको छ । अझ बढी त कतारबासी नेपालीहरूलाई । पहिलो खुसिको कुरा चलचित्र 'सिलसिला' का नायक राज तिमल्सिनाको आज शनिबार जन्मदिन हो र दोस्रो खुसीको कुरा भोली आईतबार मुस्लिम समुदायको महान पर्व ईदको अवसरमा रेड मुभिज एन्ड इन्टरटेन्मेन्ट प्रालीले कतारमा चलचित्र 'सिलसिला' प्रदर्शन गर्दैछ ।
कतारको दोहा स्थित दोहा सिटी प्लाजामा भोली आईतबारका दिन सो चलचित्र प्रदर्शन हुँदैछ । चलचित्रको पहिलो शो बिहान ८:३० मा हुनेछ भने दोस्रो र तेस्रो शो क्रमश : बिहान ११:३० र दिउँसो २:३० मा हुने कार्यक्रम संयोजक निराजन भण्डारीले जानकारी दिए ।
राजेन्द्र उप्रेतीले निर्देशन गरेको सो चलचित्रमा बिराज भट्ट, रेखा थापा, राज तिमल्सिना, सोनिया केसीलगायतका कलाकारहरूले अभिनय गरेका छन् ।
चलचित्रको 'सागर सरी चोखो माया..' बोलको गीत निकै चर्चामा आएको थियो भने नायक राज तिमल्सिना र नायिका सोनिया केसी बिचको चुम्बनले पनि निकै चर्चा पाएको थियो ।
यसैगरी सोही स्थानमा सेप्टेम्बर १७ तारिखका दिन अर्को नेपाली चलचित्र 'गंगाजल' पनि प्रदर्शन हुँदैछ । चलचित्र 'गंगाजल' मा बिराज भट्ट, रेखा थापा, सोभिता सिंखडा, शुसिल क्षेत्रीलगायतका कलाकारको अभिनय रहेको छ । यस चलचित्रमा सरकारी मातहतमा हुने भ्रष्टाचार र त्यसबाट पीडित पक्ष एवं भ्रष्टाचारका कारण देशलाई परेको नराम्रो असरलाई पर्दा मार्फत देखाउन खोजिएको छ । चलचित्रको निर्देशन प्रमोद भण्डारीले गरेका हुन् ।
नायिका शोभिता सिंखडा र कतारमा बस्दै आएका सञ्चारकर्मी निराजन भण्डारीको बिशेष पहलमा यी दुई चलचित्र कतारमा प्रदर्शन हुन लागेको हो । आगामी दिनहरूमा पनि यसैगरी नेपाली चलचित्रलाई बिदेशमा लैजान बिशेष पहल गर्ने योजना बुन्दै गरेको नायिका सिंखडाले फिल्मीखबरलाई बताइन् ।
कार्यक्रमको बारेमा थप जानकारी लिन चाहेमा ५५३००६६९, ७७७१८०८५, ५५४६२९८३ र ७७५८४२७० मा सम्पर्क गर्न सकिने नायिका सिंखडाले जानकारी दिईन् ।
फिल्मीखबर डटकम परिवार नायक राज तिमल्सिनाको जन्मदिनको शुभकामना व्यक्त गर्दै कतारमा प्रदर्शन हुन लागेको चलचित्र 'सिलसिला' र 'गंगाजल' को सफलताको कामना गर्दछ ।
