संसारलाई एकैठाउँमा जोड्ने नेटवर्कको सञ्जाल फेसबुक हिजोआज लोकप्रिय बन्दै गईरहेको छ । फेसबुकमा आवद्ध हुने नेपाली झण्डै ६ लाख पुगेका छन्। इन्टरनेटको पहुँच भएका ९० प्रतिशतभन्दा बढी नेपालीले फेसबुकको प्रयोग गर्ने गरेको तथ्याङ छ ।
फेसबुक प्रयोगकर्ता दिन प्रतिदिन बढ्दै गएपछि नेपाली चलचित्र निर्माता तथा निर्देशकहरूले फेसबुकको राम्रो सदुपयोग गरेका छन् । यसरी पछिल्लो समयमा फेसबुकको सदुपयोग गर्ने व्यक्तिमा चलचित्र लेखक तथा निर्देशक सुरज सुब्बा 'नाल्बो' पनि पर्छन् ।
सुरजले निर्देशन गरेको चलचित्र 'बाटो मुनिको फूल' को टेलर र पोस्टरहरू उनको वालमा प्रसस्त देख्न सकिन्छ । अनलाईन, पत्रपत्रिका, टेलिभिजन, एफ एम जस्ता सञ्चार माध्ययममा लामो समयसम्म बिज्ञापन दिन सक्ने अवस्था नरहेपछि उनले फेसबुकलाई आफ्नो चलचित्रको प्रचार प्रसार गर्ने माध्यय बनाएका छन् ।
अहिले उनको वालमा सो चलचित्रका फरक फरक १० वटा पोस्टरहरूको साथमा १ मिनेट ६ सेकेन्ड, १ मिनेट २ सेकेन्ड ,४३ सेकेन्ड, ३१ सेकेन्डका टेरलहरू र ३ मिनेट ३ सेकेन्डको एउटा गीत हेर्न सकिन्छ । उनले ति पोस्टर तथा टेलरहरूलाई सय भन्दा बढी साथीहरूलाई ट्याग समेत गरेका छन् जसमा अधिकांशले ति चिजलाई मन पराएर प्रतिक्रिया समेत दिएका छन् ।
सामाजिक भेदभाव तथा प्रेमकथामा आधारीत गरेर निर्माण गरिएको चलचित्र 'बाटोमुनिको फूल' को सार्वजनिक प्रदर्शन माघ महिनाबाट हुने भएको छ । यश कुमार र राजेश घतानीले निर्माण गरेको सो चलचित्रमा यश कुमार, बाबु बोगटी, रेखा थापा र नन्दिता केसीले मुख्य भुमिका निर्वाह गरेका छन् । चलचित्रमा यश कुमारको संगीत छ ।
यसैगरी उनले फेसबुक मार्फत आफूले निर्देशन गर्न लागेको अर्को चलचित्र 'सायद' को पनि ३ वटा पोस्टर केही साता अगाडी सार्वजनिक गरिसकेका छन् । दुर्गिस फिल्मसको ब्यानरमा निर्माण हुन लागेको सो चलचित्र मार्फत सुनिल रावल र संयम पुरीले नायकको रूपमा डेब्यू गर्दै छन् । झरना थापा, अनुप बराललगायतका कलाकारको अभिनय रहने सो चलचित्रको छायाँकन मंसीर महिनामा गरिने भएको छ ।
