निर्माता तथा निर्देशक अशोक शर्मालाई चिन्ने र भेट्ने जति प्राय सबैले फिल्म कहिले बनाउने भनेर सोध्ने गर्छन ? कोहीले त उनलाई चलचित्र बनाउने पेशाबाट हात धुनु भयो कि क्याहो पनि भन्न छुटाउदैनन् ।
३० बर्षको चलचित्र करियरमा एक दशक निर्माता र निर्देशक भएर चिनिएका अशोक आखिर किन चलचित्र बनाउदैनन् त ? २०४९ सालमा ट्रक ड्राइभरबाट निर्माताको रूपमा सुरू भएको उनको यात्रा सिता, गरिब, निरमाया, मिस्टर रामकृष्णे, यो मायाको सागर हुदै २०६१ सालमा आएर चलचित्र मितिनिमा ब्रेक भएको थियो । मितिनि पछी उनले कुनै चलचित्र निर्माण गरेका छैनन् ।
आखिर किन, अशोक टाढिदैछन् त फिल्मी दुनियाबाट ? कारण रहेछ उनलाई त्यो संख्याको पर्खाई । हाल डिजिटल फर्म्याटमा फिल्म वितरण गर्ने संस्था डिजिटल सिनेमा नेपालका प्रबन्धक भएर दिन विताई रहेका अशोक १०० कहिले पुग्छ भनेर औला भाचिरहेका छन् ।
२०६४ साल बैशाख २ गते स्थापना भएको डिसिएनको नेटवर्क अर्न्तगत देशभरि ६९ वटा हल रहेकाले जव त्यो नेटवर्कको संख्या १०० पुग्छ तब उनले आफ्नो नवौँ प्रोजेक्टको चलचित्र बनाउने घोषणा गर्ने बताएका छन् । फिल्मीखबरसंग कुरा गर्दै उनले भने ' जव त्यो संख्या १०० पुग्छ म तुरून्त चलचित्र निर्माण गर्छु । '
अशोकको बाचा अनुसार सो चलचित्र थ्रील लभस्टोरीमा आधारित हुने छ । तयार भएको स्क्रिप्टलाई हातमा हल्लाउदै उनले भने 'मलाई चलचित्र बनाउन धेरै समय लाग्दैन मात्र चाहियो सय ।' यस्तै सो चलचित्रसंगै उनले चेलिबेटी बेचबिखन सम्बन्धी र एक कमेडी चलचित्र पनि निर्माण गर्ने तयारी गरिरहेका छन् ।
हाल डिसिएनको नेर्टवर्क लिष्टमा ६९ वटा हल भएपनि थप आधा दर्जन हलमा डिसिएनको सर्भर जोड्ने तयारी भईरहेको छ । यहि क्रममले डिसिएनले आफ्नो नेटवर्क विस्तार गरे अशोकले यो बर्षको अन्तिम तिर आफ्नो फिल्म बनाउने घोषणा गर्नेछन नभए फेरी १०० को पर्खाइमा ६८ सालमा उनको चलचित्रलाई पर्खनु पर्ने छ ।
