अमेरिकी सरकारको आयोजनामा डेमोक्रेसी भिडियो च्यालेन्ज प्रतियोगितामा विश्व विजेता बनेका नेपाली युवा निर्देशक अनुप पौडेल आधा महिने अमेरिका भ्रमण सकेर नेपाल फर्किएका छन् ।
सेप्टेम्बर ७ तारिखका दिन अमेरिका गएका अनुपले अमेरिकी विदेश मन्त्री हिलारी क्लिन्टन लगायत ओबामा प्रशासनका उच्च पदाधिकारीसंग भेट गरेका थिए । हिलारी क्लिनटनले उनलाई प्रमाणपत्र सहित सम्मान पनि गरेकी थिइन् ।
अनुप सपनाको देश भनेर चिनिने अमेरिकाको वाशिंङटन डिसीमा ६ दिन, न्यूयोर्कमा ५ दिन र लसएन्जलस शहरमा ४ दिन बसेका थिए । अमेरिकाको बसाईमा उनी विभिन्न फिल्म स्टूडियो तथा रियालीटी शोमा सहभागी समेत भएका थिए ।
प्रजातन्त्रलाई कालोको परिभाषा दिदै उनले बनाएको १ मिनेट २९ सेकेण्डको सो भिडियोले विश्वका ८९ देशका २ हजार २ सय प्रतिस्पर्धीलाई उछिनेको थियो । गएको असार ७ गते अमेरिकी सरकारले सो प्रतियोगितामा अनुप विश्व विजेता भएको घोषणा गरेको थियो ।
विश्व विजेता बनेपछी एकाएक चर्चाका पात्र बनेका पौडेलले फिल्मीखबरसंग कुरा गर्दै 'अमेरिकाका विभिन्न संस्थाले नयाँ काम गर्दा आफुलाई सहयोग गर्ने बचन समेत दिएको' बताएका छन् ।
