दशकौं देखि नेपाली चलचित्र क्षेत्रमा योगदान दिएका चलचित्रकर्मीलाई सम्मान गरिएको छ ।
राजधानीमा सोमबार अभियान श्री सम्मान संस्थाले आयोजना गरेको एक कार्यक्रममा महानायक राजेश हमाल, नायिका करिश्मा मानन्धर, निर्देशक उज्जवल घिमिरे, अभिनेता मुकुन्द श्रेष्ठ सम्मानित भएका हुन् । उनीहरूको साथमा रंग पत्रकार डा. प्रदिप भट्टराई, बिजय रत्न तुलाधार र समाज सेवी तथा समता शिक्षाका प्रवर्तक उत्तम सञ्जेललाई अभियान श्री सम्मान पुरस्कारले सम्मान गरिएको हो । 
महानायक राजेश हमाल एक साता यता अमेरिकामा रहेकाले उनको त्यो सम्मान सहयोगी रोशन हमालले ग्रहण गरेका थिए । कार्यक्रममा पर्यटन तथा नागरिक उडड्यन मन्त्री शरद सिहँ भण्डारीले ति व्यक्तिहरूलाई सम्मान गरेका थिए ।
निर्माता तथा कुनै बेलाका नायक कृष्ण मल्ल अध्यक्ष रहेको सो सस्थाले विगत २७ बर्षदेखि यस्तो सम्मान कार्यक्रमको साथमा विविध सामाजिक कार्यक्रमहरू गर्दै आएको छ । प्रत्यक्ष रूपमा नेपाली चलचित्र उद्योगलाई माथि उठाउन लागि परेका कलाकार र रंगपत्रकारलाई प्रोत्साहन स्वरूप अभियनले सो सम्मान कार्यक्रम राखेको हो ।
