बिकास आचार्यको निर्देशन रहेको चलचित्र 'नाइ नभन्नु ल' ले आगामी शनिबार राजधानीको गोपीकृष्ण हलमा ५१ औं दिन मनाउँदै छ ।
गएको भाद्र ४ गतेबाट प्रदर्शनमा आएको सो चलचित्र अहिले गोपीकृष्ण हलमा मात्र प्रदर्शन भईरहेको छ । देशभरका २१ स्टेशनमा प्रदर्शन भएको सो चलचित्रले हाल सम्म एक करोड भन्दा बढीको व्यापार गरेको निर्देशक आचार्यले बताएका छन् । गोपीकृष्णबाट मात्र १९ लाख कलेक्सन भएको उनको भनाई छ ।
चलचित्र आगामी शुक्रबारबाट काठमाण्डौको कलंकी सिनेमा घरमा प्रदर्शन हुँदैछ भने काठमाण्डौ बाहिर ५० भन्दा बढी स्टेशनमा यो चलचित्र प्रदर्शन हुन बाँकी छ । चितवनमा प्रदर्शन भईसकेको यो चलचित्र पुन: चितवनमा प्रदर्शन गर्न लागिएको निर्देशक आचार्यले बताए ।
जीवन लुईटेल, ऋचा सिंह ठकुरी, सुमन सिंह, मुकेश आचार्य, मिथिला शर्मा, ममता प्रधानलगायतका कलाकारको अभिनय रहेको चलचित्र 'नाइ नभन्नु ल' लाई रमेशजंग रायमाझीले निर्माण गरेका हुन् । चार उत्कृष्ट गीतहरू रहेको उक्त चलचित्रको शिर्ष गीतको सिआरबिटी अहिले सम्म नेपाल करिब डेढ लाख पटक डाउनलोड भईसकेको छ । चलचित्रमा महेश खड्काको संगीत रहेको छ ।
