फिल्म सम्बन्धी बिषयबस्तु तथा समाचार प्रसारण गर्ने हेतुले स्थापना गरिएको गोपीकृष्ण टिभी फिल्मीमा आज देखि दैनिक एउटा नेपाली चलचित्र देखाईने भएको छ ।
टिभी फिल्मीबाट प्रत्येक दिन बेलुकी ७ बजे देखि चलचित्र देखाईने कार्यकारी निर्माता निशा अधिकारीले फिल्मीखबरलाई जानकारी दिएकी छिन् ।
नेपाली चलचित्रकी नायिका समेत रहेकी निशाको अनुसार बेलुकी देखाईएको फिल्मलाई भोली पल्ट बिहान ७ बजे पुनः देखाईने छ । टिभी फिल्मीमा आज बेलुकी 'अर्जुन' भन्ने चलचित्र देखाईदैछ ।
हाल परीक्षण प्रसारणमा रहेको सो टेलिभिजनमा यस अघि पुराना तथा नयाँ नेपाली चलचित्रका गीतहरू मात्र देखाईदै आईएको थियो । यस्तै आज औपचारिक रूपमा उद्घाटन गरिने भनिएको यो टेलिभिजनको उद्घाटन कार्यक्रम भने केही दिनका लागि पर सरेको छ ।
