आगामी मंसीर ३ गतेबाट देशव्यापी रूपमा सार्वजनिक गरिने भनेर प्रचार प्रसार गरिएको चलचित्र 'बाटो मुनिको फूल' एक हप्ता पछि सरेको छ । अब यो चलचित्र मंसिर १० गते देशव्यापी रूपमा सार्वजनिक हुनेछ ।
मंसीर ३ गते दुई चलचित्र 'खुसी' र 'तिमी मात्र तिमी' प्रदर्शन हुन लागेकोले 'बाटो मुनिको फूल' एक हप्ताका लागी पछि सारिएको निर्माता राजेश घतानीले फिल्मीखबरलाई जानकारी दिए । चलचित्र एक आपसमा भिडाएर त्यसको असर निर्मातालाई मात्र नभएर सिंगो चलचित्र उधोगलाई पर्ने भएकोले प्रदर्शनको मिती सार्नु परेको निर्माता घतानीको भनाई छ ।
गायकद्वय यशकुमार र बाबु बोगटी, रेखा थापा, नन्दिता केसी, अरुण रेग्मी, गणेश उप्रेती, सुभद्रा अधिकारी आदि कलाकारले मुख्य भूमिका निर्वाह गरेको यो चलचित्रका निर्देशक सुरज सुब्बा 'नाल्बो' हुन् । प्रेमकथा तथा सामाजिक भेदभावका विषयमा निर्माण भएको यो चलचित्रमा यशकुमारको संगीत छ ।
गायनमा आफ्नो बेग्लै पहिचान बनाएका दुई गायक यशकुमार र बाबु बोगटीको चलचित्र हेर्न दर्शक मात्र हैन चलचित्रकर्मी पनि आतुर रहेको बुझिएको छ । पछिल्लो समयमा अधिकांश चलचित्रहरू एक हप्तामा नै उत्रन बाध्य भएको अवस्थामा यो चलचित्र भने कति हप्ता चल्ने हो त्यो भने हेर्न बाँकी नै छ ।
