चलचित्र 'कसम हजुरको' ले निर्माता कृषा चौलागाईंलाई पहिलो बिदेश भ्रमण मात्र गराएन उनलाई सो चलचित्रले म्युजिक भिडियोको निर्देशक समेत बनायो ।
केहि समय अगाडी आफ्नो दोस्रो चलचित्र 'कसम हजुरको' प्रदर्शन गर्न कतार पुगेकी कृषाले चलचित्रको प्रदर्शन गर्नुको साथसाथै एउटा म्युजिक भिडियो पनि निर्देशन गर्न भ्याईन् । गायक नबिन के भट्टराईको 'सोच्दा सोच्दै' बोलको गीतमा उनले सोभिता सिंखडा, हसन खान र बालहरि रानालाई नचाउन सक्षम भईन् ।
निर्देशक बन्नु आफ्नो सानै देखिको रहर भएको बताउने कृषाले त्यो रहर आज केहि हदसम्म पुरा भएको बताईन् । ‘कतार जस्तो ठाउँमा म्युजिक भिडियोको निर्देशन गर्न पाउनु मेरो लागी एकदम खुसीको कुरा हो ' कतारबाट फर्किए लगत्तै फिल्मीखबरसँग उनले आफ्नो खुसी साटिन् । उनले भनिन्, 'अब त चलचित्र पनि निर्देशन गर्ने आँट आएको छ। ' दुई दिन लगाएर सकेको सो भिडियोको निर्देशन गर्न उनलाई निकै गार्हो भएछ तर निर्देशक भनेर सम्मान दिँदा आफूले ति अफ्ठ्याराहरू बिर्सेको कृषाले बताईन् । 
निकै उत्साहित मुद्रामा देखिएकी कृषालाई फिल्मीखबरले के अब चलचित्रको निर्देशक बन्ने हो त ? भन्ने प्रश्न गर्दा उनले भनिन्, 'अहिलेका अधिकांश निर्देशकले निर्देशन गरे जस्ता चलचित्र त म पनि निर्देशन गर्न सक्छु तर म उनीहरू जस्तो निर्देशक बन्न चाहन्न ।' निर्देशक बन्नु कुनै जोक नभएको बताउने कृषाले आफूले निर्देशन गरेको भिडियो एउटा प्रयोग मात्र रहेको बताईन् । उक्त भिडियो दर्शक तथा समिक्षकले मन पराईदिए आगामी दिनमा त्यो भन्दा राम्रो भिडियो निर्देशन गर्न सक्ने उनको भनाई छ ।
आफ्ना दुई असफल चलचित्रका निर्देशकलाई चलचित्र राम्रो बनाउन नसकेको भन्दै गाली गर्ने कृषाले आफूले निर्देशन गरेको भिडियो कस्तो बन्यो होला त ? भिडियो हेरेर दर्शकले कृषालाई उनले गरे भन्दा बढी गाली गर्छन् या ताली नै दिन्छन् । त्यो भने चाडै नै देख्न पाईने छ ।
