चलचित्र 'बाटो मुनिको फूल' को प्रोमोशनका लागी सोमबार साँझ करिब ७ बजे चलचित्रका नायकद्वय यश कुमार, बाबु बोगटी, नायिका नन्दिता केसी, खलनायक आकाश खवास, निर्देशक सुरज सुब्बा, करियोग्राफर अराज केशब, निर्माता त्रय राजेश घतानी, बिरेन्द्र अफताब र अच्युत श्रेष्ट गरि नौ जनाको टोली नारायणगढ पुगेको छ ।
गत बुधबार राजधानीमा रेडकार्पेट प्रिमियर गरि शुक्रबारबाट देशव्यापी प्रदर्शनमा आएको चलचित्र 'बाटो मुनिको फूल' लाई पूर्वमा पुन: रेडकार्पेट प्रिमियर गर्न सो टोलीले सोमबार पूर्वको यात्रा तय गरेको हो । नारायणगढ प्रस्थान गर्नु अगाडी फिल्मीखबरसँग कुरा गर्दै निर्देशक सुब्बाले आउँदो शुक्रबार बिर्तामोडमा रहेको कृष्ण टाकिजमा चलचित्र 'बाटो मुनिको फूल' को रेडकार्पेट प्रिमियर गर्ने बताए ।
करिब ५ दिनको भ्रमणमा निस्केको सो टोलीले कृष्ण टाकिजमा रेडकार्पेट प्रिमियर गर्नु पूर्व नारायणगढ, हेटौंडा, पोखरा र कुस्माका हलहरूमा दर्शकसँग चलचित्र हेरी सो चलचित्रको बारेमा प्रतिक्रिया लिनेछ । सोही क्रममा टोलीले भोली मंगलबार बिहान करिब ११ बजे नारयणगढ स्थित जल्मा हलमा एक कार्यक्रमको आयोजना गरी दर्शकसँगै बसेर चलचित्र हेर्नेछ । जल्मा हलमा दर्शकसँग चलचित्रको बारेमा प्रतिक्रिया लिएर टोली मंगलबार नै हेटौंडा पुग्ने छ भने बुधबार सो टोली पोखरा पुग्ने छ । हेटौंडा र पोखरामा बिशेष कार्यक्रम गरी उक्त टोली बिहिबार कुस्मा पुग्ने कार्यक्रम छ ।
पछिल्लो समयमा निकै आश लाग्दो चलचित्रको रूपमा हेरिएको सो चलचित्रको प्रोमोशनका लागी कुनै कन्जुस्याईं नगर्ने युनिटले बताएको छ । 'बाटो मुनिको फूल' प्रेमकथा तथा सामाजिक भेदभावका विषयमा निर्माण भएको चलचित्र हो ।
