भ्वाईस इन्टरटेनमेन्टको ब्यानरमा रेश मरहठ्ठा र माधब ढकालले निर्माण गरेको चलचित्र 'च्यालेन्ज' को सम्पादन कार्य सकिएको छ । करिब तीन महिना अगाडीबाट शुरू गरिएको सम्पादन बिहिबार समाप्त भएको चलचित्रका निर्देशक श्याम भट्टराईले फिल्मीखबरलाई जानकारी दिए ।
पोस्टप्रोडक्सनको कार्य तिब्र गतिमा भईरहेको सो चलचित्रको ग्राफिक्सको काम निर्देशक सिमोश सुनुवारले शुक्रबारबाट नै गर्ने बताईएको छ । यस्तै ग्राफिक्सको कामसँगै डबिङ र व्याकग्राउण्ड म्युजिकको काम पनि शुरू गरिने नायक तथा निर्माता रेशले जानकारी दिएका छन् । बैशाख महिनामा प्रदर्शन गर्ने तयारीका साथ काम अघि बढेको सो चलचित्रको प्रोमोशन भने फाल्गुन महिनाको तेस्रो साताबाट गर्ने बताईएको छ ।
करिब १ करोडको लगानीमा सम्पन्न हुन लागेको चलचित्र 'च्यालेन्ज' मा रेश मरहठ्ठा, आयुष रिजाल, रेखा थापा, खुस्बु न्यौपाने, बीएस राणा, ममता प्रधानको साथमा करिब एक दर्जन बिदेशी नागरिकले समेत अभिनय गरेका छन् । चर्चित पपगायक नबिन के भट्टराईले पहिलो पटक संगित दिएको यस चलचित्रमा राजेन्द्र खड्गीको द्वन्दनिर्देशन रहेको छ ।
