बक्स अफिस र सिने स्टार मसिकको आयोजनामा हुन लागेको बक्स अफिस फिल्म लिग २०६७ यहि माघ १५ गतेबाट शुरू हुनेभएको छ । रंगपत्रकार, चलचित्रका कलाकार, निर्देशक, निर्माता, मोडल, नृत्य कलाकार , गायक तथा टेलीचलचित्रका कलाकार गरी आठ टिमको सहभागीता रहने सो फुटबल खेल बुटवल रंगशालाबाट शुरू हुनेभएको छ ।
लिगको पहिलो खेल अन्तर्गत माघ १५ गते बुटवल रंगशालामा चलचित्रका कलाकार र नृत्य कलाकार बिच भिडन्त हुनेछ । त्यसपछी माघ २२ गते हेटौंडा रंगशालामा रंगपत्रकार र गायक बिच भिडन्त हुनेछ । माघ २८ गते भने धरान रंगशालामा निर्मातासँग मोडलहरू भिड्ने छन् । त्यसपछि लिगको पहिलो चरण अन्तर्गतको अन्तिम खेल फाल्गुन ७ गते निर्देशक र टेलिचलचित्रका कलाकारबिच मेची रंगशालामा हुनेछ ।
सेमीफाईनल खेल भने पोखरा रंगशाला र काठमाण्डौको सानो गौचरनमा हुने छ । सेमिफाईनल खेल अन्तर्गत कलाकार र नृत्य कलाकार बिचको बिजेता टिमसँग रंगपत्रकार र गायक बिचको बिजेता टिम पोखरा रंगशालामा भिड्ने छ । जुन खेल फाल्गुन २१ गते हुनेछ । त्यसपछि निर्माता र मोडल बिचको बिजेता टिमसँग निर्देशक र टेलिचलचित्रका कलाकार बिचको बिजेता टिम चैत्र ५ गते सानो गौचरनमा भिड्ने छ । बक्स अफिस फिल्म लिग २०६७ को अन्तिम खेल अर्थात फाईनल खेल चैत्र १९ गते दशरथ रंगशालामा हुनेछ ।
'अत्याधिक धनराशी बोकेर आयो फुटबलको महासंग्राम' भन्ने नारा सहित आयोजना हुन लागेको सो खेलमा बिजेता टिमले नगद रू पाँच लाख पाउने आयोजक संस्थाका प्रमुख आरके सुबेदिले जानकारी दिए । यस कार्यक्रमलाई भव्यरूपमा सफल पारिदिन नेपाली चलचित्रकर्मी, पत्रकार, कलाकार, मोडल, गायकगायिका, नृत्य कलाकार तथा दर्शकहरूलाई खेलमा सहभागिता जनाईदिन आयोजक टिमले बिनम्र अनुरोध गरेको छ । सो फुटबल खेलको फिल्मीखबर डटकम मिडिया पार्टनर रहेको छ ।
