लण्डनमा बसोबास गर्दै आएका मोडल तथा नवनायक ध्रुव दत्तले थुप्रै म्युजिक भिडियो र नेपाली चलचित्रहरुमा अभिनय गरे पनि भर्खरै मात्र आफूलाई पूर्णरुपमा कलाकार भएको अनुभूति भएको बताए ।
करिब एक महिनाको नेपाल बसाई पछि बुधबार कर्मथलो लण्डन प्रस्थान गरेका ध्रुबले आफ्नो सर्वप्रिय निर्देशक तुलसी घिमिरेको नयाँ चलचित्र 'मृगतृष्णा' मा महत्वपूर्ण भूमिकामा अभिनय गर्न पाउँदा निकै खुसी भएको बताए । चलचित्र 'द प्लान', 'विष' र 'विरताको चिनो' मा अभिनय गरिसकेका ध्रुवले चलचित्र 'मृगतृष्णा' मा काम गर्दा निकै रमाईलो अनुभव भएको र निर्देशक घिमिरेसँग धेरै कुरा सिक्न पाएकोमा खुसी व्यक्त गरे । फिल्मीखबरसँग कुरा गर्दै उनले भने, 'साँक्चिकै आज म तुलसी दाईको चलचित्रमा अभिनय गर्न पाउँदा सन्तुष्ट भएको छु ।' मृगतृष्णामा उनीसँगै विराज भट्ट, कर्म शाक्य, नन्दिता केसी, हेमन्त बुढाथोकी, शुष्मा कार्कीलगायतको अभिनय रहेको छ ।
नवनायक ध्रुब लण्डन प्रस्थान गर्नु अघि गत साता निर्देशक मिलन चाम्सको निर्देशनमा दुर्गा घलेको रचनामा गायक स्वरुपराज आचार्यले गाएको 'प्रिय तिम्रो...' बोलको गीतको म्युजिक भिडियोमा अभिनय समेत गर्न भ्याए । सो म्युजिक भिडियोमा ध्रुब नायिका दिया मास्केसँग अभिनय गरेका छन् ।
