नायक रमित ढुंगानाले मंगलबार आफ्नै भतिजा सुमन ढुंगाना र आफू स्वयले खोलेको सानु फाउन्डेसनमा रहेका नौ जना अनाथ बालबालिका र केहि चलचित्रकर्मीको माझमा केक काटी आफ्नो ३० औं जन्मदिन मनाए ।
उनलाई जन्मदिनको शुभकामना दिन नायक भुवन केसी, नायिका निरूता सिंह, निर्देशकद्वय रमेश बुढाथोकी र सुमन दाहाल, कलाकार निर्मल शर्मा र सिपी पौडेल सो फाउन्डेसनमा पुगेका थिए । आफ्नो आत्मसन्तुष्टी र ति बालबालिकाको खुसीको लागी उनले आफ्नो जन्मदिन फाउन्डेसनमा मनाएको बताए । आफ्नी भाउजुको सम्झनामा सन् २००७ मा खोलिएको सो फाउन्डेसनमा बाजुरा, रूकुम, बनेपा, दोलखाका ५ बर्ष देखि १३ बर्ष सम्मका बालबालिका रहेका छन् ।
आफ्नै खर्चमा खोलिएको सो फाउन्डेसनमा थप केहि बच्चाहरू राख्ने योजना बनाएको रमितले जानकारी दिए । बोर्डिङ स्कुलमा पढ्दै आएका ति बालबालिकाहरूको लागी उनले बार्षिक दुई लाख खर्च गर्दा रहेछन् । रमितलाई हजुरबा र रमितका भतिज सुमनलाई बाबाको नाताले बोलाउने ति बालबालिकाले आफूहरूलाई रमित हजुरबाले धेरै माया गर्ने गरेको बताए ।
