एक साता अघि निधन भएका पार्श्व गायक कुमार कान्छाको परिवारलाई आर्थिक सहयोग गर्ने हेतुले नेपलिज कल्चर एण्ड वेलफेयर यूके नामक एक संस्थाले महानायक राजेश हमालको उपस्थितिमा कान्छाको परिवारलाई आर्थिक सहयोग गरेको छ ।
निर्देशक शंकर घिमिरेको संयोजकत्वमा बुधबार पत्रकार सम्मेलनमा मार्फत सो संस्थाका प्रतिनिधी डाक्टर पदम सिंखडाले एक लाख एक रुपैयाको चेक महानायकलाई हस्तान्तरण गरेका थिए । सो संस्थाले केही संस्थासँग मिलेर केही समय अघि बेलायतमा एक सांगितीक कार्यक्रम मार्फत रकम संकलन गरेको जनाएको छ । जस अनुरुप सो कार्यक्रमबाट उठेको रकम कान्छाको परिवारलाई हस्तान्तरण गरिएको हो ।
यस्तै पछिल्लो चरणमा नेपाल र विदेशमा रहेका नेपालीहरुले स्वर्गीय हुनु अघि र पछी गायक कान्छाको परिवारलाई आर्थिक सहयोग गरिरहेका छन् । उपचारका क्रममा औषधी खर्चका लागि मुम्बईमा रहेको आफ्नो फ्ल्याट समेत कान्छाको परिवारले धरौटीमा राखेको थियो । जस अनुरुप पनि विभिन्न क्षेत्रबाट सो धरौटी फुकाउन तथा उपचारका क्रममा लागेको ऋण चुक्ता गर्न कान्छाको परिवारलाई सहयोग गर्ने क्रम अझै जारी छ ।
