होम प्रोडक्सनको पाँचौ चलचित्र 'कस्ले चोर्यो मेरो मन' प्रदर्शनमा लागि अभिनेत्री रेखा थापा आज साँझ कंगारुको देश अष्ट्रेलिया जादैछिन् । अष्ट्रेलियाको विभिन्न शहरमा आगामी जनवरी ३० तारिख देखि १३ सम्म चल्ने सो चलचित्रलाई जनवरी ३० तारिखका दिन सिड्नीमा दुई शो, फेब्रुअरी ५ र ६ तारिखका दिन पर्थमा अर्को शो र १२ र १३ मा ब्रिसबेनमा अन्तिम शो गरिने जानकारी दिईएको छ ।
रेखा फिल्मसको ब्यानरमा यस अघि चार चलचित्र निर्माण भएपनि पहिलो पटक सो ब्यानरको चलचित्र बैदेशिक थिएटरमा जान लागेको हो । 'बिदेशको ब्यापार कस्तो होला भन्ने उत्सुकताले पहिलो पटक ग्लोबल मार्केटिङमा हात हाल्दैछु', रेखाले फिल्मीखबर समक्ष भनिन् । उनी बिहिबार राति ११ बजेको फ्लाईटबाट एक्लै अष्ट्रेलिया उड्दै छिन् ।
फिल्म शो सँगै अष्ट्रेलियामा मात्र पाइने कंगारु हेर्न उनलाई धेरै हतार पनि छ रे जस अनुरुप त्यहाँको चिडियाघर समेत घुम्ने रेखाको योजना छ । करिब २० दिनको अष्ट्रेलिया भ्रमण पछि फेब्रुअरी १७ मा उनी नेपाल फर्कने छिन् ।
सबिर श्रेष्ठको निर्देशनमा तयार गरिएको सो चलचित्रले नेपाली बक्स अफिसमा राम्रो ब्यापार गरेको थियो । चलचित्रमा रेखाले राजकुमारी भएर अभिनय गरेकी छिन् भने नायक आर्यन सिग्देललाई गरिब युवकको भुमिकामा देख्न पाईन्छ ।
