नायक रमित ढुंगाना पहिलो पटक म्युजिक भिडियोमा अभिनय गर्ने भएका छन् । करिब ६ दर्जन चलचित्रमा अभिनय गरिसकेका ह्याण्डसम नायक ढुंगाना कल्पना श्रेष्ठको शब्द र टिका भण्डारीको संगीतमा टिका भण्डारी र कल्पना श्रेष्ठले गाएको एक गीतमा रमित गायिका कल्पना श्रेष्ठसँग नाच्ने छन् ।
चलचित्र माया नमारबाट कलिउडमा प्रवेश गरेका यि नायकलाई सञ्चारकर्मी तथा करियोग्राफर समन अधिकारीले पहिलो पटक म्युजिक भिडियोमा नचाउन लागेका हुन् । बुद्वको बारेमा चलचित्र निर्माण गर्न लागेका रमित अहिले समय खाली भएको र गीत पनि राम्रो भएकोले म्युजिक भिडियोमा अभिनय गर्न लागेको बताए ।
सुदूर पश्चिमको महाकालीमा रहेको चाँदनी र दोधारा पूल, कैलालीको पर्यटकिय क्षेत्र टिकापुर र कर्णाली पूलमा म्युजिक भिडियोको छायाँकन गरिने भएको छ । म्युजिक भिडियोमा नाच्नका लागी रमित हिजो नै पश्चिम तर्फ प्रस्थान गरिसकेका छन् । आफूले निर्माण गर्न लागेको चलचित्र बुद्वको बारेमा केहि रिसर्च गर्न उनी आज लुम्बिनी पुग्दैछन् भने १८ गते उनी महाकाली पुग्नेछन् । बाँकी टोली भने १८ गते काठमाण्डौबाट सूदूर पश्चिम प्रस्थान गर्नेछ ।
सोही समयमा अञ्जु पन्तले गाएको एक गीतको पनि म्युजिक भिडियोको छायाँकन गरिने भएको छ । जुन गीतमा नायिका नन्दिता केसी नाच्ने छिन् । सो म्युजिक भिडियोमा पनि समन अधिकारीकै नृत्यनिर्देशन रहनेछ ।
