काठमाण्डौको कमलपोखरी स्थित बिग सिनेमामा मंगलबार साँझ पाँच बजे लोकेन्द्र कार्कीले निर्माण गरेको चलचित्र 'शासन' रेडकार्पेटका साथ प्रिमियर हुँदैछ । हिन्दी चलचित्र प्रदर्शन गर्दै आएको सो हलमा नेपाली चलचित्र प्रदर्शन हुन लागेको यो पहिलो पटक हुनेछ ।
हुनत: यस भन्दा अगाडी थुप्रै नेपाली चलचित्रहरू सो हलमा प्रदर्शन गर्ने भनिएका थिए तर भातरिय हस्तक्षेपका कारण ती चलचित्रहरू प्रदर्शन हुन सकेका थिएनन् । यसको पछिल्लो ज्वलन्त उदाहरणको रूपमा चलचित्र 'हाँसी देउ एक फेर' लाई लिन सकिन्छ । जुन चलचित्रलाई प्रदर्शन गर्न चलचित्रका निर्माता र हल सञ्चालक बिच सम्झौता गरिएको थियो ।
गत मंसिर १७ गतेबाट सो हलमा मह जोडी अभिनित चलचित्र हाँसि देऊ एक फेर प्रदर्शन गर्न चलचित्रका निर्माता र हल सञ्चालक बिच सम्झौता गरिएता पनि त्यहाँ नेपाली चलचित्र प्रदर्शन खबर एकाएक भारत पुगेपछी फ्याक्स मार्फत सिनेमा ब्यवस्थापकलाई नचलाउन भारतको सिनेमा प्रदर्शन गर्ने एक संस्थाले दबाब दिएको थियो । जुन कुरालाई फिल्मीखबरले निकै प्राथमिकताका साथ फलोअपको रूपमा प्रकाशन पनि गरेको थियो । यति सम्मकी चलचित्रका निर्माता राजेश कुमार स्वंगमिखाले खुशी हुँदै फिल्म प्रदर्शन गर्न प्रिन्ट समेत लिएर बिग सिनेमा पुगेका थिए तर ब्यवस्थापनले १५ गते बुधबार अपरान्ह त्यो प्रिन्ट फर्काईदिएको थियो ।
स्थापना भएको एक बर्ष पुगिसक्दा पनि नेपालमा स्थापना गरिएको सो हलमा नेपाली चलचित्र नचलाईनु निकै दु:खको कुरा भन्दै सो समाचारमा थुप्रै नेपाली चलचित्र प्रेमी दर्शक र चलचित्रकर्मीले प्रतिक्रिया दिएका थिए । सायद त्यसैको प्रभावले होला आज सो हलमा पहिलो पटक नेपाली चलचित्र प्रदर्शन हुँदैछ । ढिलै भएपनि सो हलमा नेपाली चलचित्र चल्नु पक्कै पनि खुसीको कुरा हो ।
थुप्रै सञ्चारकर्मी तथा केही चलचित्रकर्मी माझ हुन लागेको सो प्रिमियर शोमा भने चलचित्रमा निर्देशक आकाश अधिकारी उपस्थित हुने छैनन् । उनले फिल्मीखबर मार्फत प्रिमियरमा सहभागी हुन नपाउँदा दु:ख व्यक्त गरेका छन् । निर्देशक अधिकारी अहिले आफूले निर्माण गरेको चलचित्र 'काठमाण्डू' को प्रदर्शनका लागी अमेरिकामा छन् ।
त्यसैगरी सो प्रिमियरमा चलचित्रकी मुख्य नायिका रेखा थापा पनि अनुपस्थित नै हुनेछिन् । उनी पनि आफूले निर्माण गरेको चलचित्र 'कस्ले चोर्यो मेरो मन' को प्रदर्शनका लागी अहिले अष्ट्रेलियामा छिन् । रेखाले पनि आफू उपस्थित हुन नपाएकोमा दु:ख व्यक्त गरेकी छिन् । चलचित्र अर्की नायिका सञ्चिता भने नेपालमै छिन् तर उनको पछिल्लो बैबाहिक काण्डले गर्दा उनी पनि सो प्रिमियरमा सहभागी हुने सम्भावना निकै न्यून छ । यि बाहेक अन्य कलाकार भने प्रिमियरमा सहभागी हुनेछन् ।
माघ २८ गतेबाट देशभर एकसाथ प्रदर्शनमा आउन लागेको सिनेमास्कोप चलचित्र 'शासन' 'राष्ट्र जुन बेला सबैभन्दा बढी संकटपूर्ण घडीमा हुन्छ, त्यहि बेला जनता देशको संरक्षणका लागी जुर्मुराउनु पर्छ' भन्ने कथा बस्तु बोकेर निर्माण गरिएको बताईएको छ । इन्टरनेश्नल मुभि मेकिङको व्यानरमा निर्माण भएको सो चलचित्रमा लोकेन्द्र कार्की, रेखा थापा, सञ्चिता लुईटेल, निर शाह, सम्राट सापकोटा, धिरेन शाक्य, हरिहर शर्मा, तृप्ती नाडखर लगायतले अभिनय गरेका छन् । चलचित्रमा शम्भुजित बाँस्कोटाको संगीत रहेको छ ।
