प्रदर्शनको मिती नजिकिंदै गर्दा निर्देशक सबिर श्रेष्ठले आफ्नो दोस्रो प्रोजेक्ट अर्न्तगतको चलचित्र 'इशारा' को पोस्टर (फष्ट लुप ) फिल्मीखबर डटकम र सामाजिक संजाल फेसबुक मार्फत एकसाथ सार्वजनिक गरेका छन् । सार्वजनिक गरिएको चलचित्रको पोस्टरमा नायिकाद्वय रेखा थापा  र उमा बेबीको साथमा नायकद्वय उत्तम प्रधान र भुपेन चन्दको तस्विर राखिएको छ ।

अनुशी फिल्म्सको व्यानरमा अरूण रेग्मी र उमा बेबीले निर्माण गरेको चलचित्र 'इशारा' मार्चको पहिलो साता सिक्किममा रेगुलर शो हुने निश्चित भएपछि पोस्टर सार्वजनिक गरिएको निर्देशक श्रेष्ठले जानकारी दिए । पहिलो चलचित्र 'कस्ले चोर्‍यो मेरो मन' बाट नै चर्चामा आएका निर्देशक श्रेष्ठले निर्देशन गरेको चलचित्र 'इशारा' को अधिकांश भाग सिक्किममा नै छायाँकन गरिएको र चलचित्रका निर्माता तथा नायिका उमा बेबी र नायक उत्तम प्रधान पनि सिक्किमकै भएकाले सो चलचित्रलाई शुरूमा सिक्किममा प्रदर्शन गर्न लागिएको निर्देशक श्रेष्ठको भनाई छ । सिक्किममा प्रदर्शन गरेपछि यो चलचित्र नेपालमा प्रदर्शन हुने भएको छ । 

बिशुद्व प्रेमकथामा आधारित रहेर निर्माण गरिएको उक्त चलचित्रमा शिबम् अधिकारीको कथा, महेश खड्काको संगीत, किरण खरेलको गीत, कमल राईको नृत्य र शिब ढकालको छायाँकन रहेको छ ।


आशा गरौं जसरी निर्देशक श्रेष्ठ आफ्नो पहिलो चलचित्रबाट चर्चामा आए त्यसैगरी उनी र उनको यस चलचित्रसँगै चलचित्रका कलाकारले पनि चर्चा कमाउने छन् । चलचित्रको युनिटलाई फिल्मीखबरको तर्फबाट सफलताको शुभकामना !