चलचित्र 'नाइ नभन्नु ल' बाट एकाएक चर्चामा आएका नायक जीवन लुईटेल बुधबार मध्यान्न करिब ४ बजे तिर राजधानीको आई क्लबमा मि. नेपालका ४१ जना प्रतिस्पर्धीहरूसँग अन्तर्क्रिया गर्नमा व्यस्त देखिए ।
मि. नेपाल बन्ने सपना बुनेर प्रतिस्पर्धामा उत्रेका ती युवाहरूले नायक जीवनलाई उनले अभिनय गरेको चलचित्र 'नाइ नभन्नु ल' को शिर्ष गीतले स्वागत गरेका थिए । आफूले अभिनय गरेको गीतले स्वागत गरेपछि खुसी हुँदै नायक जीवनले उनीहरूलाई करिब एक घण्टा सल्लाह र सुझाव दिएका थिए । शनिवार हुन लागेको मि. नेपालका प्रतिस्पर्धीहरूलाई सन् २००२ का मि. नेपाल समेत रहेका नायक जीवनले आफूले यस क्षेत्रमा लागेर भोगेका अनुभवहरू उनीहरूसँग साटेका थिए ।
एक्सपोज नेपाल डटकमको प्रस्तुतीमा दिनेश शाही र प्रवेश गिरीले संयुक्त रूपमा आयोजना गर्न लागेको सो कार्यक्रममा नायक जीवन निर्णायक मण्डलमा समेत रहने छन् । नायक जीवनको साथमा नेपाली चलचित्र क्षेत्रका केहि हस्तीहरू पनि सो कार्यक्रमको निर्णायक मण्डलमा रहने आयोजकले जनाएको छ । आउँदो शनिवार राजधानीको प्रज्ञा भवनमा दिउँसो २ बजेबाट शुरू हुने सो कार्यक्रमका करियोग्राफर प्रवेश गिरी र चाँदनी लामिछाने रहेका छन् ।
