हरेक मानिसका आ-आफ्नै सपना हुन्छन् । कसैको पूरा हुन्छन् त कसैको पूरा हुँदैनन् । अधुरा सपना लिएर नौलो संसार खोज्नेहरु मध्ये थोरैको सपना मात्र साकार हुने गर्दछ । पूरा नभएका सपना लिएर नौलो संसारमा प्रवेश गर्नेहरुको कथा हो चलचित्र 'सपनाको नौलो संसार' ।
सरस्वती सिने आर्टको व्यानरमा जुहार पाण्डे, दिनेश कुमार लामा र सुधाश्री मल्लको निर्माण रहेको यस चलचित्रमा महानायक राजेश हमाल, दिलिप रायमाझी, तृप्ती नाड्कार, ऋचा घिमिरे, जितु नेपाल लगायतको अभिनय रहेको छ । हामी नेपालीहरुको नयाँ वर्ष २०६८ को पावन अवसरमा मलेसियामा अवस्थित नेपाल म्यूजिक सेन्टरले बजारमा ल्याउन लागेको यस चलचित्रमा नेपालको मात्र दृश्यहरु नभई यूरोपका विभिन्न भागमा छायाँङ्कन गरिएको छ । चलचित्रलाई राजु शाहले निर्देशन गरेका हुन् ।
दिलिप रायमाझी र ऋचा घिमिरे चलचित्रका यस्ता पात्र हुन् जसले आफ्नो नौलो सपना साकार पार्न धेरै परिश्रम गर्नुपर्दछ । पूरा नभएका अधुरा सपना पूरा गराउन संघर्ष गर्ने संघर्षशिल पात्रका रूपमा यि दुई कलाकार प्रस्तुत भएका छन् । तपाई हाम्रो जस्तै विदेशमा आफ्नो सपनाको संसार साकार पार्न विदेशिएका नायक दिलिप रायमाझी तथा नायिका ऋचा घिमिरेको जीवनसँग तपाई हाम्रो जीवनमा कतै मेल खाने त होइन ? त्यसको लागि त एक पटक चलचित्र हेर्ने पर्ने हुन्छ ।
