तीर्थप्रसाद श्रेष्ठको निर्माणमा देवकुमार श्रेष्ठले निर्देशन गरेको चलचित्र 'बदमास' शुक्रबारदेखि प्रदर्शनमा आएको छ । क्यू सिस्टमबाट प्रदर्शनमा आएको सो चलचित्र एक्सन प्रधान रहेको छ ।
सज्जन मान्छे कसरी बदमास बन्छ भन्ने कुरालाई मुख्य कथाबस्तु बनाएर निर्माण गरिएको सो चलचित्रमा अभिनेता शिव श्रेष्ठ मुख्य भुमिकामा छन् । चलचित्रमा सानैदेखि बाबुआमा तथा आफन्तको माया नपाएर बदमास बनेको चरित्रमा अभिनेता श्रेष्ठ उभिएका छन् भने अर्का कलाकार सुनिल श्रेष्ठ पुस्तैनी धनसम्पत्तिले मत्तिएर बदमास बनेको चरित्रमा प्रस्तुत भएका छन् ।
चलचित्रमा जिम्मी गुरुङ, रन्जना शर्मा, उषा पौडेल, शुभेच्छा थापा, राजेन्द्र खड्गी लगायतले पनि अभिनय गरेका छन् । कमलकृष्ण र शरण जोशीको संगीत रहेको सो चलचित्रमा शान्ता नेपाली र प्रदीप श्रेष्ठको नृत्य, राजेन्द्र खड्गीको द्धन्द, मौनता श्रेष्ठको लेखन, श्याम रायमाझीको छायांकन तथा ईश्वर कोइरालाको सम्पादन रहेको छ ।
